"ჩემი ყველა აქტივობა სრულად შეესაბამება გერმანიის მთავრობისა და ევროკავშირის პოზიციას", — საქართველოში გერმანიის ელჩი პეტერ ფიშერი გუშინ, 24 სექტემბერს ოცნების ხელისუფლების საგარეო საქმეთა სამინისტროში დაბარებას სოციალურ ქსელში ეხმაურება.

"ნუ დაიჯერებთ ცრუ ნარატივს, თითქოს მე და კოლეგა დიპლომატები რაღაცნაირად "თაღლითურ დღის წესრიგს" მივყვებით. ჩემი ყველა აქტივობა სრულად შეესაბამება გერმანიის მთავრობისა და ევროკავშირის პოზიციას, რაც არაერთხელ გაცხადებულა წერილობით ევროპის საბჭოს, ჩვენი 27 არჩეული ლიდერის მიერ", — წერს პეტერ ფიშერი.

შეგახსენებთ, რომ ის გუშინ საგარეო უწყებაში დაიბარეს. ოცნების პრემიერის, ირაკლი კობახიძის თქმით, ეს "დიპლომატიური ზომაა", როდესაც "საქართველოში მოქმედი ელჩი, არღვევს უხეშად ვენის კონვენციის პრინციპებს, ასე ხდება ხოლმე მისი დაბარება".

გერმანიის ელჩის საგარეო უწყებაში დაბარებას გამოეხმაურა გერმანიის საგარეო უწყებაც. მათ მიერ ქართულ ენაზე გამოქვეყნებულ განცხადებაში წერია, რომ "ელჩი წარმოადგენს ფედერალური მთავრობის პოზიციას და მოქმედებს ვენის კონვენციის სრული დაცვით".

"ჩვენ კატეგორიულად ვგმობთ "ქართული ოცნების" წარმომადგენლების მხრიდან აგრესიულ რიტორიკას საქართველოში გერმანიის ელჩის მიმართ და მის დღევანდელ უსაფუძვლო დაბარებას. ელჩი წარმოადგენს ფედერალური მთავრობის პოზიციას და მოქმედებს ვენის კონვენციის სრული დაცვით", — ნათქვამია განცხადებაში.

საგარეო უწყებიდან დაბრუნებულმა პიტერ ფიშერმა ასევე დაწერა, რომ "დეტალურად უარყო მასზე უსაფუძვლო თავდასხმები და პასუხისმგებლობა საქართველო-გერმანიის ურთიერთობებში ახალ ვარდნაზე საქართველოს მთავრობასა და ქართული ოცნების წარმომადგენლებს დააკისრა".

"გერმანიის ელჩის პირველი დაბარება საქართველოში. გერმანიისთვის, მე დეტალურად უარვყავი ჩემზე უსაფუძვლო თავდასხმები და პასუხისმგებლობა საქართველო-გერმანიის ურთიერთობებში ახალ ვარდნაზე დავაკისრე საქართველოს მთავრობასა და "ქართული ოცნების" წარმომადგენლებს დავაკისრე, რომლებმაც ქმედებებითა და რიტორიკით გამოიწვიეს ეს და ბლოკავენ ევროკავშირისკენ გზას. არ მომისმინეს. მე რადიკალი არ ვარ. გერმანია საქართველოს მეგობრად რჩება", — წერს ელჩი.