"რეანიმაციულ განყოფილებაშია, შესაბამისად მდგომარეობა სერიოზულია" — გუგა ქაშიბაძე ლოტკინზე მომხდარი აფეთქებისას დაშავებულზე

ლოტკინზე აფეთქების შედეგად დაშავებული გოგოს მდგომარეობა მძიმეა, — ამის შესახებ "ტვ პირველთან" საუბრისას ექიმი გუგა ქაშიბაძე აცხადებს.

მისი თქმით, დაშავებულს დამწვრობა აქვს სახეზე, ზემო კიდურებზე, გულმკერდისა და ზურგის ნაწილზე.

"დაახლოებით 48% არის დამწვრობა. ეს არის სახე, ზემო კიდურები, გულმკერდის და ზურგის ნაწილი. მოთავსებულია რეანიმაციულ განყოფილებაში სავარაუდოდ გაზის აფეთქების შედეგად აქვს მიღებული დაზიანება. …არის რეანიმაციულ განყოფილებაში, შესაბამისად მდგომარეობა არის სერიოზული", — აცხადებს გუგა ქაშიბაძე.

ლოტკინზე, სამღერეთის ქუჩაზე 2 აფეთქება წუხელ გვიან ღამით მოხდა.

როგორც NEWS.On.ge-ს შსს-ში უთხრეს, გამოძიება დაწყებულია 240-ე, 240-ე პრიმა მუხლებით, რაც ობიექტზე უსაფრთხოების წესის დარღვევას და გაზის ობიექტზე უსაფრთხოების წესის დარღვევას გულისხმობს.

მომხდარის შესახებ თავდაპირველად სოციალურ ქსელში ინფორმაცია, ფოტო და ვიდეომასალა გაავრცელა ლაშა შეროზიამ. როგორც ის წერს დაშავებული 19 წლის გოგოა.

"წუხელ ჩვენს წინ შენობა აფეთქდა, 19 წლის გოგო დაშავდა, გადარჩა საბედნიეროდ. ამის შემდეგ ისევ გაზის სუნი რომ იყო სამაშველოს ვუთხარი სუნია გაზის და გადაამოწმეთ ყველაფერი თქო, იქედნურად ზურგი მაქცია და 114 იყო, გადაკეტა და საფრთხე აღმოფხვრილიაო. ეს სუნი გაიფანტა უბრალოდო. რის შემდეგაც იყო უდიდესი წნევით აფეთქება და ნგრევა", — წერს ლაშა შეროზია.