შაბათს ჩატარებული რეფერენდუმის შემდეგ პირველ ინტერვიუში, კატალონიის ავტონომიური რეგიონის პრეზიდენტმა კარლოს პუჩდემონიმ BBC-ის უთხრა, რომ კატალონია დამოუკიდებლობას მიმდინარე კვირის ბოლოს, ან მომდევნო კვირის დასაწყისში გამოაცხადებს.

პუჩდემონის ინტერვიუს წინ უძღოდა ესპანეთის მეფე ფელიპე მეექვსის სატელევიზიო მიმართვა, რა დროსაც მან თქვა, რომ კატალონიის მთავრობა კანონის მიღმა მოქმედებს. მისივე თქმით, ესპანეთში უკიდურესად სერიოზული ვითარებაა შექმნილი, რის გამოც მან მთელ ქვეყანას ერთიანობისკენ მოუწოდა.

BBC-იმ კატალონიის ავტონომიური რეგიონის პრეზიდენტს ჰკითხა, რა მოხდება იმ შემთხვევაში, თუ ოლქის მმართველობას საკუთარ თავზე აიღებს ესპანეთის ხელისუფლება. აღნიშნულის პასუხად პუჩდემონიმ თქვა, რომ ეს იქნება შეცდომა, რომელიც ყველაფერს შეცვლის.

ჯერჯერობით არანაირი მოლაპარაკება არ გამართულა კატალონიისა და ესპანეთის მთავრობებს შორის. კატალონიის ხელისუფლება მიიჩნევს, რომ ესპანეთის მთავრობამ დაარღვია დემოკრატიული პრინციპები, როცა პირველ ოქტომბერს მიმდინარე რეფერენდუმისას კატალონიის დამოუკიდებლობის მომხრეთა წინააღმდეგ პოლიციური ძალა გამოიყენა. ესპანურმა პოლიციამ რეფერენდუმის დღეს დაიკავა რამდენიმე საარჩევნო უბანი და მოსახლეობას ხმის მიცემის საშუალება არ მისცა. ამ დღეს 800-მდე ადამიანი დაშავდა, მათ შორის იყვნენ პოლიციელებიც.

პირველი ოქტომბრის რეფერენდუმში, რომელიც ესპანეთის საკონსტიტუციო სასამართლომ არალეგიტიმურად სცნო, საარჩევნო უბნებზე მისული ამომრჩევლების 90-მა პროცენტმა მხარი კატალონიის დამოუკიდებლობას დაუჭირა. რეფერენდუმში ხმა, სულ, ამომრჩეველთა საერთო რაოდენობის დაახლოებით 40-მა პროცენტმა მისცა.