არასრულწლოვანის ცემაში ბრალდებულ მკლავჭიდელ ხატია ვიბლიანს 3000-ლარიანი გირაო შეუფარდეს. გადაწყვეტილება მოსამართლე ლელა მარიდაშვილმა მიიღო. პროკურორმა ნათია ნოზაძემ განაცხადა, რომ ხატია ვიბლიანმა არასრულწლოვანს ხელებისა და ფეხების გამოყენებით მიაყენა ფიზიკური შეურაცხყოფა.

ხატია ვიბლიანმა ჟურნალისტებთან საუბრისას თქვა, რომ უმიზეზოდ არაფერი ხდება, თუმცა ძალადობის მომხრე არაა.

"რა თქმა უნდა, არ ვიცოდი არასრულწლოვანი რომ იყო. როცა ჩემი ბულინგი წავიდა, მერე გავიგე. მე გიჟი არ ვარ... მე ვარ თავმოყვარე ქალი და ვარ მშობელი, დედა, მეტს არ ვიტყვი არაფერს ამ ეტაპზე", — თქვა ხატია ვიბლიანმა.

პროკურორ ნათია ნოზაძის განცხადებით, გირაოს მოთხოვნისას გაითვალისწინეს ის, რომ ბრალდებული ხატია ვიბლიანი მარტოხელა დედაა, წარსულში არ ყოფილა ნასამართლები, ასევე "აღიარებს, ბოდიშს იხდის და მზად არის, აანაზღაუროს მორალური, მატერიალური ზიანი".

"გირაოს მუხლი ნაკლებად მძიმე კატეგორიისაა, მაგრამ პირველი, რაზეც ყურადღებას ვამახვილებთ, არის ის, რომ არის მარტოხელა დედა და 4 წლის შვილს მარტო ზრდის. ბავშვის ერთადერთი პატრონი არის ის, რასაც ვითვალისწინებთ.

ასევე ვითვალისწინებთ, რომ ის წარსულში არ არის ნასამართლევი, ასევე აღიარებს, ბოდიშს იხდის და მზად არის, პირადადაც მოიხადოს ბოდიში, აანაზღაუროს მორალური, მატერიალური ზიანი, რაც არის. ის ყველაფერზე თანახმაა, რომ არასრულწლოვანს მაქსიმალურად შეუმსუბუქოს მდგომარეობა. ექსპერტიზა დანიშნულია, ჯერ არ მიგვიღია დასკვნა. მკვეთრი დაზიანება, გამოხატული არ არის. არასრულწლოვანი დედამ თავის დაზღვევის მიზნით, იაშვილის კლინიკაში გადაიყვანა, ვინაიდან სახე ჰქონდა გაწითლებული და კისრის არეში ნაკაწრი ჰქონდა. ოჯახს სურს, კანონის სიმკაცრით დაისაჯოს ბრალდებული", — განაცხადა პროკურორმა.

შეგახსენებთ, რომ 14 აგვისტოს მოქალაქე გვანცა ბაუჟაძემ სოციალურ ქსელში არასრულწლოვანზე ძალადობის ამსახველ ვიდეო გაავრცელა და დაწერა, რომ ქალმა "ფსიქოლოგიურად და ფიზიკურად იძალადა" 15 წლის მოზარდზე "მხოლოდ იმის გამო, რომ ბიჭი მაღაზია "ორი ნაბიჯის" მოლარეს გამოესარჩლა".

პროკურატურის ცნობით, შინაგან საქმეთა სამინისტროს მიერ ჩატარებული გამოძიებით დადგინდა, რომ მიმდინარე წლის 11 სექტემბერს, თბილისში, ერთ-ერთ მაღაზიაში ბრალდებულმა ფიზიკური შეურაცხყოფა მიაყენა არასრულწლოვანს, შემდეგ კი მაღაზიის მიმდებარედ გააგრძელა მასზე ფიზიკური ძალადობა.

ბრალდებულს ბრალდება საქართველოს სისხლის სამართლის კოდექსის 126-ე მუხლის პირველი პრიმა ნაწილის "ა" ქვეპუნქტით (ცემა, რამაც დაზარალებულის ფიზიკური ტკივილი გამოიწვია) ჰქონდა წარდგენილი, რაც სასჯელის ზომად ორ წლამდე თავისუფლების აღკვეთას ითვალისწინებს.

შსს-მ არასრულწლოვანის მიმართ ძალადობის ფაქტზე გამოძიება დაიწყო