პარტია თავისუფლების მოედნის წევრები საპატრულო პოლიციის ხელმძღვანელთან შეხვედრას ითხოვენ. მათ დღეს შინაგან საქმეთა სამინისტროსთან გამართულ ბრიფინგზე განაცხადეს, რომ საქმე გუშინ, კახა კალაძის შტაბთან მოქალაქეებზე ძალადობას ეხება.

თავისუფლების მოედნის ლიდერი ლევან ცუცქირიძე და პარტიის სხვა წევრები პოლიციას ახსენებენ, რომ მათი მოვალეობა მოქალაქეების უსაფრთხოების დაცვაა.

"მოვედით აქ იმისთვის, რომ შევახსენოთ მათ, რომ ისინი ანგარიშვალდებული ჩვენთანაც არიან, არამხოლოდ რომელიმე კონკრეტულ პოლიტიკურ პარტიასთან.

ამიტომ ახლა დავტოვებთ ოფიციალურ მოთხოვნას, რომ საპატრულო პოლიციის ხელმძღვანელი შეგვხვდეს და გვითხრას, რის გაკეთებას აპირებენ იმისთვის, რომ დაიცვან საქართველოს მოქალაქეები ასეთი ბანდიტური თავდასხმებისგან," — განაცხადა ლევან ცუცქირიძემ.

გუშინ, 8 სექტემბერს მელიქიშვილის გამზირზე, კახა კალაძის საარჩევნო შტაბთან, "ოცნების" მხარდამჭერები ფიზიკურად დაუპირისპირდნენ იქ შეკრებილ მოქალაქეებს, აქტივისტებსა და ჟურნალისტებს. ე.წ. ტიტუშკებმა იძალადეს "პუბლიკის", "ნეტგაზეთის" და ასევე უნგრელ ჟურნალისტ ლასლო მეზეშზე. ის სასწრაფო დახმარების ეკიპაჟმა კლინიკაში გადაიყვანა. ამ დრომდე არც ერთი მოძალადე დაკავებული არ არის.

შინაგან საქმეთა სამინისტრომ მელიქიშვილის გამზირზე მომხდარ დაპირისპირებასთან დაკავშირებით გამოძიება ჯგუფური ძალადობის მუხლოთ დაიწყო, თუმცა ამ დრომდე არავინ დაუკავებიათ.

ასევე იხილეთ: