8 სექტემბრის მოვლენებთან დაკავშირებით შსს-მ გამოძიება ჯგუფურად ჩადენილ ძალადობისა და წინასაარჩევნო კამპანიის დროს ძალადობის მუხლით დაიწყო. ამის შესახებ უწყება განცხადება ცოტა ხნის წინ გაავრცელა.

"როგორც საზოგადოებისათვის ცნობილია, შინაგან საქმეთა სამინისტრომ, მიმდინარე წლის 8 სექტემბერს, თბილისში, მელიქიშვილის გამზირზე, კახი კალაძის საარჩევნო შტაბის მიმდებარე ტერიტორიაზე მომხდარ დაპირისპირების ფაქტთან დაკავშირებით გამოძიება სისხლის სამართლის კოდექსის 126-ე მუხლის პირველი პრიმა ნაწილით დაიწყო, რაც ჯგუფურად ჩადენილ ძალადობას გულისხმობს. მიმდინარეობს საგამოძიებო მოქმედებები.

გარდა აღნიშნულისა, პარტია "ქართული ოცნება — დემოკრატიული საქართველოს" წარმომადგენლების განცხადების საფუძველზე, გამოძიება დამატებით, კიდევ ერთ საქმეზე — სისხლის სამართლის კოდექსის 162-ე პრიმა მუხლით დაიწყო, რაც წინასაარჩევნო აგიტაციის და წინასაარჩევნო კამპანიის ღონისძიების დროს ძალადობას ან ძალადობის მუქარას გულისხმობს.

შინაგან საქმეთა სამინისტრო მოუწოდებს ყველა მოქალაქეს წინასაარჩევნო კამპანიის მიმდინარეობისას თავი შეიკავონ ძალადობის, ძალადობის პროვოცირების და სხვა ისეთი მოქმედებებისგან, რომელიც აზიანებს წინასაარჩევნო გარემოს და ხელს უშლის საარჩევნო სუბიექტებს კამპანიის წარმოებაში, რაც თავის მხრივ კანონით დასჯადი ქმედებაა", — ნათქვამია შსს-ს მიერ გავრცელებულ ინფორმაციაში.

შეგახსენებთ, რომ გუშინ, 8 სექტემბერს, კახა კალაძის შტაბთან შტაბის წევრებმა მოქალაქეებზე, აქტივისტებსა და ჟურნალისტებზე ფიზიკურად იძალადეს.

ოცნების მხარდამჭერებმა "პუბლიკის" ორ ჟურნალისტს ქეთო მიქაძესა და ალექსანდრე ქეშელაშვილს ტელეფონები წაართვეს, "ნეტგაზეთის" ჟურნალისტს, ქეთევან ხუციშვილს კი პოლიციელმა აგინა და პროფესიულ საქმიანობაში ხელი შეუშალა. ოცნების მხარდამჭერებმა ფიზიკურად იძალადეს და სახეზე დაზიანებები მოაყენეს ასევე უნგრელ ჟურნალისტს, ლასლო მეზეშს.

ინგოროყვას კლინიკის კლინიკური დირექტორის თქმით 8 სექტემბერს მომხდარი დაპირისპირების შედეგად მათთან 4 მოქალაქე შემოიყვანეს, აქედან 2-მა უკვე დატოვა სამედიცინო დაწესებულება.