"ჩვენ ვნახეთ მთავრობად წოდებული ბანდიტების დაორგანიზებული ძალადობა, გადაცმული პოლიციელების მონაწილეობით, კრიმინალების მონაწილეობით, "რუსული ოცნების" პარტიული წევრების მონაწილეობით," — ასე ეხმაურებიან კოალიცია ცვლილებისთვის გუნდში გუშინ კახა კალაძის შტაბთან განვითარებულ მოვლენებს და აცხადებენ, რომ დღეს, 7 საათზე ფილარმონიასთან დაგეგმილ საპროტესტო აქციას უერთდებიან.

კოალიციის ერთ-ერთმა ლიდერმა ელენე ხოშტარიამ ბრიფინგზე განაცხადა, რომ არცერთი მსგავსი "გამოხტომა მშვიდობიანი, ხელცარიელი ახალგაზრდა თუ არა ახალგაზრდა მოქალაქეების წინააღმდეგ, რეაგირების გარეშე არ ჩაივლის".

კოალიცია ცვლილებისთვის სახელით, ჩვენი გუნდის სახელით, გვინდა, გამოვეხმაუროთ გუშინდელ ამაზრზენ, საშინელ ფაქტს, რომელიც მოხდა მელიქიშვილის გამზირზე.

ჩვენ ვნახეთ მთავრობად წოდებული ბანდიტების დაორგანიზებული ძალადობა, გადაცმული პოლიციელების მონაწილეობით, კრიმინალების მონაწილეობით, "რუსული ოცნების" პარტიული წევრების მონაწილეობით. არაადამიანური საქციელი საკუთარი მოქალაქეების წინააღმდეგ.

რაც ჩვენ ვნახეთ გუშინ, ეს არ არის, აღარ ვლაპარაკობ, სამართლიანობაზე და პოლიტიკაზე, ეს არის არაადამიანური არაქართული შეურაცხმყოფელი მთელი ჩვენი სახელმწიფოსი, ქართველობის, საქართველოსი და აღარ ვლაპარაკობ ევროპულ პერსპექტივაზე.

ეს, სამწუხაროდ, არ არის გასაკვირი "რუსული ოცნებისგან" იმიტომ, რომ სწორედ ეს არ გვინდა ჩვენ, როდესაც ვებრძვით"რუსულ ოცნებას".

მთავარია, რომ მათ იცოდნენ, რომ არცერთი მსგავსი გამოხტომა მშვიდობიანი, ხელცარიელი ახალგაზრდა თუ არა ახალგაზრდა მოქალაქეების წინააღმდეგ, არ ჩაივლის რეაგირების გარეშე. ჩვენ არ დავთმობთ არცერთი ჩვენი მოქალაქის თმის ღერსაც კი, არავის გაუვა რომ ვითომ პოლიციის კორდონს ამოფარებული ასე მოეპყროს საკუთარ მოქალაქეებს. არ აქვს მნიშვნელობა არავის პოლიტიკურ პოზიციას. როგორც დღეს ამაზრზენად ისაუბრა კალაძემ თურმე ვინმე ქალია და ვინმე ქალი არ არის — ეს არ არის საქართველო და ასეთი არ იქნება საქართველო.

დღეს 7-ზე, ფილარმონიასთან აქტივისტებმა დააანონსეს აქცია და როგორც გუშინ, ჩვენი მთელი კოალიციის შემადგენლობა ვუერთდებით ამ აქციას. რა თქმა უნდა, ვიქნებით იქ და რა თქმა უნდა ყოველ ჯერზე პასუხს აგებს ყველა ის მოძალადე, რომელიც ესე იქცევა.

ასევე მინდა ვუთხრა ყველა მოძალადე/შესრულებელს, ცალკეულ ფიგურანტებს, პოლიციელს, არა პოლიციელს თუ ვითომ პოლიციელს. ყველასი თქვენი სახელი და გვარი არის იდენტიფიცირებული და ყველანი აუცილებლად დაისჯებით," — განაცხადა კოალიცია ცვლილებისთვის ლიდერმა, ელენე ხოშტარიამ ბრიფინგზე.

გუშინ, 8 სექტემბერს მელიქიშვილის გამზირზე, კახა კალაძის საარჩევნო შტაბთან, "ოცნების" მხარდამჭერები ფიზიკურად დაუპირისპირდნენ იქ შეკრებილ მოქალაქეებს, აქტივისტებსა და ჟურნალისტებს. ე.წ. ტიტუშკებმა იძალადეს "პუბლიკის", "ნეტგაზეთის" და ასევე უნგრელ ჟურნალისტ ლასლო მეზეშზე. ის სასწრაფო დახმარების ეკიპაჟმა კლინიკაში გადაიყვანა. ამ დრომდე არც ერთი მოძალადე დაკავებული არ არის.

შინაგან საქმეთა სამინისტრომ მელიქიშვილის გამზირზე მომხდარ დაპირისპირებასთან დაკავშირებით გამოძიება ჯგუფური ძალადობის მუხლოთ დაიწყო, თუმცა ამ დრომდე არავინ დაუკავებიათ.

დაშავებული 4 ადამიანიდან 2 ინგოროყვას კლინიკიდან გაწერეს.

ასევე იხილეთ: