"[თვითმმართველობის არჩევნების ჩაშლა] უნდათ. მგონი არ გამოუვათ. ქართულ ოცნებას ვერაფერს ვერ უზამენ" — ამის შესახებ ქუთაისში გიორგი გახარიას პარტიის მერობის კანდიდატმა პაატა ცაგარეიშვილმა "ტვ პირველის" ეთერში განაცხადა.

მისი თქმით, ადგილობრივ თვითმმართველობის არჩევნებში შესვლა "მოსულა".

"ეს არ არის სწორი ვარიანტი, მაგრამ ქართულ პოლიტიკაში ვარ და ეს ჩემთვის უცხო არ არის. სამწუხაროდ და საუბედუროდ, თუ რამე ცუდი შეიძლება მოიფიქროს ქართველმა. ცუდი არის ის, რომ ერთმანეთის ჯინაზე ერთი ფრონტის ხალხი ერთმანეთს ებრძვის. მაგალითად, რატომ მაინც და მაინც 4 ოქტომბერი აქციის დღედ? 5 იყოს, 6 იყოს, ესე იგი საარჩევნო თარიღს ჩაისვეს, ეს ჩაუსვეს ოპოზიციას, ვინც არჩევნებში მონაწილეობს. იმიტომ, რომ კოლექტიურმა ნაციონალურმა მოძრაობამ კარგად იცის, რომ უკვე ვეღარ დაამარცხებენ ქართულ ოცნებას". არჩევნებში არ მონაწილეობენ, უკვე ყველა ვადამ ჩაიარა, რაც არ უნდა ნანობდნენ, არ ნანობდნენ, მორჩა. ამიტომ ერთადერთი რაც შეუძლიათ, არის რომ გააფუჭონ საქმე, არის ასეთი გამოთქმა ზოგადი პოლიტიკაში და ყველგან, რომ თუ რამის გაკეთებ არ შეგიძლია, ნუ გააფუჭებ. ანუ, ისე ნუ მოიქცევი, რომ მერე ვინც მოვა, შენი გაფუჭებული გამოასწოროს და მერე რაღაცა გააკეთოს.

ვინც გეგმავს ჩაშალოს არჩევნების დღე, ისინი ძალიან ვნებენ...

ჟურნალისტი: არჩევნების დღეს ჩაშლიან?

უნდათ. მგონი არ გამოუვათ. ქართულ ოცნებას ვერაფერს ვერ უზამენ. მათ უნდათ გაუმწარონ ქართულ დემოკრატიას ვითარება. არ წამომყევით ბოიკოტში?! დამტოვეთ გარეთ? არადა თავისი თავი თვითონ დატოვეს. აი, ახლა ნახავ როგორ... პირდაპირ ეთერში ვერ ვიტყვი რას აპირებენ... მე როგორც გამოცდილი პოლიტიკოსი ვიტყოდი ჩემ თავზე, ეს მოსულა, ჩვენ აი ამ თამაშში უნდა შევიდეთ, ამ ბრძოლაში უნდა შევიდეთ, უკვე არამარტო საქართველოს N1 პრობლემასთან ქართულ ოცნებასთან არამედ სამწუხაროდ საქართველოს მეორე პრობლემასთან — ბოიკოტთან," — თქვა პაატა ცაგარეიშვილმა TV პირველის ეთერში დიანა ტრაპაიძის კითხვის საპასუხოდ

პაატა ცაგარეიშვილი ქართული ოცნების ხელისუფლებაში ყოფნის პერიოდში, 2014-2016 წლებში შერიგებისა და სამოქალაქო თანასწორობის საკითხებში საქართველოს სახელმწიფო მინისტრი იყო. ამჟამად ის ქუთაისში გახარიას პარტიის მერობის კანდიდატია.

შეგახსენებთ, რომ ოპოზიციის ნაწილი, 4 ოქტომბერს საპროტესტო აქციას აანონსებს. აქციის ერთ-ერთი ორგანიზატორი პაატა ბურჭულაძე აცხადებს, რომ "4-ში დაიწყებენ, 4-შივე დამთავრდება ყველაფერი. 5-ში "ქართული ოცნება" უკვე აღარ უნდა იყოს მთავრობაში".