ოცნების პარლამენტში ე.წ. დროებითი საგამოძიებო კომისიის თავმჯდომარემ კომისიის 460-გვერდიანი დასკვნა წარადგინე, რის შემდეგაც მადლობა გადაუხადა კომისიის წევრებს გაწეული მუშაობისთვის. წულუკიანის თქმით, ეს დოკუმენტი "მალე გადაეცემა საქართველოს პარლამენტის არქივს და ამ ყველაფერს ჩვენი ისტორიკოსები და არა მხოლოდ ისტორიკოსები — ახალი თაობაც გამოიყენებს".

"თუ თქვენ ნებას დამრთავთ, მადლობას გადავუხდი ყველა იმ პირს, ვინც კომისიის გამართული მუშაობა შესაძლებელი გახადა და მოცემული დასკვნის შედგენაში მონაწილეობა მიიღო. პირველ რიგში მინდა უღრმესი მადლობა გადავუხადო კომისიის წევრებს, ჩემს მოადგილე ბატონ სოზარ სუბარს, ბატონ ალეკო ტაბატაძეს, ბატონ თენგიზ შარმანაშვილს, ბატონ ირაკლი ქადაგიშვილს, რომელიც ცოტა მოგვიანებით შემოგვიერთდა, ბატონ ალუდა ღუდუშაურს, ბატონ გურამ მაჭარაშვილს და ბატონ ილია ინჯიას და რასაკვირველია ამჟამინდელ იუსტიციის მინისტრს ბატონ პაატა სალიას, რომელმაც რამდენიმე სხდომის შემდეგ დაგვტოვა.

მე მადლიერი ვარ იმ ჰარმონიული გარემოსთვის, რომელიც თქვენ შექმენით კომისიის ფარგლებში. იმ მხარდაჭერისთვისა და რჩევებისთვის, რომელსაც გვაძლევდით და იმ გამძლეობისთვის, რომელიც გამოიჩინეთ. მე ფიქრობ და თამამად შემიძლია ვთქვა, ყოველგვარი სხვა უკანა აზრების გარეშე, ანუ გულწრფელად, რომ ჩვენ ვიყავით საუკეთესო გუნდი. ასევე დიდი მადლობა მინდა გადავუხადო ბატონ პარლამენტის თავმჯდომარეს პარლამენტის აპარატის ხელმძღვანელს და აპარატის თითოეულ თანამშრომელს, ვინც ჩვენ ქმედით დახმარებას აღმოგვიჩენდა საჭიროების გაჩენისთანავე. კომისიას ჰყავდა ადმინისტრაციული პერსონალი, რომელსაც ასევე მადლობა მინდა ვუთხრა. ისინი სხვადასხვა დროს სხვადასხვა ტიპის საქმეს ასრულებდნენ და თუნდაც პატარა კენჭი ვინც დადო ამ დიდ საქმეში — მათ მადლობას ვუხდი ჩემი და კომისიის სახელით.

თუ არავის ეწყინება განსაკუთრებული მადლობა მინდა, გვარების გარეშე, გადავუხადო იმ, სულ ერთ ხელზე ჩამოსათვლელ ადამიანებს, ვინც კომისიის სხდომების დასრულების შემდეგ ჩემთან ერთად დღე და ღამე მუშაობდა იმისთვის, რომ კომისიის დასკვნა ყოფილიყო დაფუძნებული ფაქტებზე. ეს იყო ის პირობა, რომელიც ჩვენ კომისიის საქმიანობის დაწყებისას დავდეთ. მადლობა ეკუთვნით, ასევე, იმ უწყებებს, რომლებმაც ჩვენთან ითანამშრომლეს — საქართველოს პრეზიდენტის ადმინისტრაციას, საქართველოს მთავრობას და მთავრობის ადმინისტრაციას, სხვადასხვა სამინისტროებს და სხვადასხვა კერძო თუ სახელმწიფო ორგანიზაციებს. ასევე, ტელევიზიებს, რომლებმაც ფასდაუდებელი არქივი მოაწოდეს კომისიას და თანამშრომლობდნენ იმისთვის, რომ ჩვენი საქმიანობა საზოგადოებისთვის ყოფილიყო ხელმისაწვდომი.

ბოლოს დავძენ, რომ ეს დასკვნა, რომელიც თქვენს წინაშეა წარმოდგენილი 460 გვერდს მოიცავს დანართების გარეშე. დანართები არის ასეულობით გვერდი და ძალიან დიდი მოცულობის ელექტრონული არქივიც შეიქმნა, ვინაიდან თითოეული ის ვიდეო თუ აუდიომასალა, რომელიც დასკვნის ძალიან ბევრ სქოლიოში აქვს მოხსენიებული, რა თქმა უნდა, ბმულის იმედად ჩვენ ვერ ვიქნებით — ყველა მასალა არის გადმოწერილი, დაარქივებული და ეს ყველაფერი, მე ვვარაუდობ, რომ ძალიან მალე გადაეცემა საქართველოს პარლამენტის არქივს და დიდი იმედი მაქვს, რომ ამ ყველაფერს ჩვენი ისტორიკოსები და არა მხოლოდ ისტორიკოსები — ახალი თაობაც გამოიყენებს.

ძალიან დიდი მადლობა თქვენ ყველას ნდობისთვის.", — განაცხადა "ოცნების" პარლამენტის ე.წ. საგამოძიებო კომისიის თავმჯდომარემ, თეა წულუკიანმა "ოცნების" პარლამენტში კომისიის 460-გვერდიანი დასკვნის წარდგენის შემდეგ.