მწერალი გიორგი კეკელიძე სინდისის პატიმრებთან დაკავშირებით სოციალურ ქსელში წერს. მისი თქმით, შეიძლება განაჩენები, რომლებიც მომდევნო დღეებში გამოცხადდება სხვების ტკივილია, თუმცა მათ, ვინც "მოქალაქეს ყოფნა" აირჩიეს ეს უნდა "შეიმჩნიონ და დაინახონ".

"ცხოვრებას აქვს გარდაუვალი და შემოწმებული წესი — რაც დიდხანს გრძელდება — ჩვეულებრივდება. უცნაური ის არის, რომ ზოგჯერ ეს საშველია და ზოგჯერ — სირცხვილი.
ადამიანად ყოფნის ამოცანა, რთული და აგერ, თუნდაც ჩემგან დაუძლეველი, ეგეც არის — პირველი მიიღო და მეორეს შეებრძოლო.

პირველი საკუთარი ტკივილის გაჩვეულებრივებაა, მეორე — სხვისი და მე ასე მგონია, თუ მოქალაქედ ყოფნა გადაწყვიტე, პირველი უნდა აიტანო სწორედ და მეორე — არა.
სხვისი ჭირი სადაც ღობეს ჩხირად იქცა, ის ღობე წაიქცა.

დღეს და ხვალ რომ განაჩენები გამოცხადდება, კი — სხვისი ტკივილია, სხვისი დარდი. მაგრამ თუ მოქალაქედ ყოფნა აირჩიე, ეგ უნდა შეიმჩნიო და დაინახო. გულწრფელი ვიქნები — თუნდაც საკუთარ თავზე ძალდატანებით.

რადგან, ღობე, რომელიც წაიქცევა, შენიცაა, შენც გიცავს და შენს მომავალსაც", — დაწერა გიორგი კეკელიძემ.