"ნეტგაზეთის" და "ბათუმელების" დამფუძნებელი და დირექტორი, მზია ამაღლობელი უკრაინელ ჟურნალისტ მაქსიმ ბუტკევიჩთან და აზერბაიჯანელ ჟურნალისტ ულვი ჰასანლისთან ერთად, ვაცლავ ჰაველის სახელობის ადამიანის უფლებათა პრემიის 2025 წლის ფინალისტთა სიაშია.

ფინალისტთა შესახებ გამოქვეყნებულ ინფორმაციაში ნათქვამია, რომ მზია ამაღლობელის დაპატიმრებამ და შემდგომმა განაჩენმა იგი პრესის თავისუფლებისა და სახელმწიფო რეპრესიების წინაშე მდგრადობის სიმბოლოდ აქცია, რაც ხაზს უსვამს ჟურნალისტების სასიცოცხლო როლს ადამიანის უფლებების დაცვაში.

"მზია ამაღლობელი 2000 წლიდან პიონერი ქართველი ჟურნალისტი და დამოუკიდებელი მედიასაშუალებების "ბათუმელებისა" და "ნეტგაზეთის" თანადამფუძნებელია.

მიუხედავად იმისა, პოლიტიკურად მოტივირებული პატიმრობის და მკაცრად მოპყრობისა, რაც საპროტესტო აქციების დროს ძალადობის გამოაშკარავებას მოჰყვა, მისმა გაბედულმა ქმედებებმა ხელი შეუწყო მედიის მიმართ რეპრესიებსა და პოლიტიკურ ძალადობაზე ყურადღების მიპყრობას, რაც მიზნად ისახავდა საქართველოს დემოკრატიული მომავლის უზრუნველყოფას.

მისმა დაპატიმრებამ და შემდგომმა განაჩენმა 2025 წელს იგი პრესის თავისუფლებისა და სახელმწიფო რეპრესიების წინაშე მდგრადობის სიმბოლოდ აქცია, რაც ხაზს უსვამს ჟურნალისტების სასიცოცხლო როლს ადამიანის უფლებების დაცვაში," — აღნიშნულია მზია ამაღლობელზე პრემიის ფინალისტთა შესახებ გამოქვეყნებულ ინფორმაციაში.

გამარჯვებული 2025 წლის 29 სექტემბერს, სტრასბურგში, ევროპის საბჭოს საპარლამენტო ასამბლეის საშემოდგომო სესიის გახსნაზე გამოვლინდება და მას 60 000 ევრო, თასი და დიპლომი გადაეცემა.

ვაცლავ ჰაველის სახელობის ადამიანის უფლებათა პრემია ევროპის საბჭოს საპარლამენტო ასამბლეამ, ვაცლავ ჰაველის ბიბლიოთეკასა და "ქარტია 77" (Charta 77) ფონდთან ერთად 2013 წელს დააარსა. პრემიის მიზანია ევროპასა და მის ფარგლებს გარეთ ადამიანის უფლებათა სფეროში სამოქალაქო საზოგადოების გამორჩეული ქმედებების აღიარება.