"მსურველთა კოალიციის" წევრებმა მზადყოფნა გამოხატეს, საომარი მოქმედებების დასრულების შემდეგ, უკრაინაში განალაგონ მხარდაჭერის ძალები, რათა ხელი შეუწყონ ქვეყნის ცისა და ზღვის უსაფრთხოებას და უკრაინის შეიარაღებული ძალების აღდგენას", — ამის შესახებ "მსურველთა კოალიციის" თანათავმჯდომარეების საფრანგეთის პრეზიდენტ ემანუელ მაკრონისა და დიდი ბრიტანეთის პრემიერმინისტრ კირ სტარმერის მიერ გავრცელებულ განცხადებაშია ნათქვამი, რომელიც 17 აგვისტოთია დათარიღებული.

17 აგვისტოს ემანუელ მაკრონი და კირ სტარმერი, პრეზიდენტ ზელენსკის მონაწილეობით, "მსურველთა კოალიციის" ლიდერების ჯგუფის ვირტუალურ შეხვედრას თავმჯდომარეობდნენ.

ლიდერები შეიკრიბნენ, რათა განეხილათ უკრაინის მხარდაჭერა და სამშვიდობო მოლაპარაკებების შემდგომი ნაბიჯები პრეზიდენტ ტრამპისა და პრეზიდენტ პუტინის ალასკაში შეხვედრის შემდეგ.

ლიდერებმა კიდევ ერთხელ დაადასტურეს უკრაინისადმი მხარდაჭერა და შეაქეს პრეზიდენტ ზელენსკის სურვილი სამართლიანი და მდგრადი მშვიდობისკენ, რადგან ის ვაშინგტონში პრეზიდენტ ტრამპთან შემდგომი კონსულტაციებისთვის ემზადება.

ლიდერებმა ასევე შეაქეს პრეზიდენტ ტრამპის ერთგულება უკრაინისთვის უსაფრთხოების გარანტიების მიცემის გამო, რომელშიც "მსურველთა კოალიცია" სხვა ზომებთან ერთად სასიცოცხლო როლს შეასრულებს.

მათ კიდევ ერთხელ გაუსვეს ხაზი მზადყოფნას, საომარი მოქმედებების შეწყვეტის შემდეგ განლაგდნენ დამამშვიდებელი ძალები, რათა ხელი შეუწყონ უკრაინის ცისა და ზღვის უსაფრთხოებას და უკრაინის შეიარაღებული ძალების აღდგენას.

საფრანგეთის პრეზიდენტი და დიდი ბრიტანეთის პრემიერმინისტრი სხვა ევროპელ ლიდერებთან ერთად მონაწილეობას მიიღებენ 18 აგვისტოს ვაშინგტონში აშშ-ის პრეზიდენტ დონალდ ტრამპისა და უკრაინის პრეზიდენტ ვოლოდიმირ ზელენსკის შეხვედრაში.

ცნობისათვის ვოლოდიმირ ზელენსკი უკვე ჩაფრინდა ვაშინგტონში. ოფიციალური შეხვედრები თეთრს სახლში ვაშინგტონის დროით 12:00 საათიდან დაიწყება.