მალაიზიის პრემიერმინისტრის ანვარ იბრაჰიმის თქმით, ტაილანდმა და კამბოჯამ "დაუყოვნებლივ და უპირობო ცეცხლის შეწყვეტაზე" შეთანხმებას მიაღწიეს. მისივე თქმით, მხარეები მზად არიან სასაზღვრო რეგიონებში შეტაკებები დაასრულონ. ინფორმაციას The Washington Post ავრცელებს.

კამბოჯამ და ტაილანდმა შეთანხმებას მალაიზიაში გამართული მედიაციის შემდეგ მიაღწიეს.

ლიდერების შეხვედრას პოზიტიურად აფასებს კამბოჯის პრემიერმინისტრი ჰუნ მანეტიც. მისი თქმით, ქვეყნებმა ერთმანეთის მიმართ ნდობა უნდა აღადგინონ.

"დარწმუნებული ვარ, რომ მოლაპარაკებების შედეგად ორივე მხარეს ასობით ათასი ადამიანი ნორმალურ ცხოვრებას დაუბრუნდება. დროა დავიწყოთ ნდობის აღდგენა კამბოჯასა და ტაილანდს შორის", — განაცხადა მან.

შეთანხმება ძალაში შუაღამიდან შევა.

ცნობისთვის, ორი ქვეყნის 817 კმ-იანი საზღვრის გარკვეულ მონაკვეთებზე დავა საუკუნეზე მეტია გრძელდება. აქამდე სხვადასხვა წლებში შეტაკებები და მსხვერპლიც დაფიქსირდა, მათ შორის 2011 წლის ერთკვირიანი არტილერიით მოქმედებების დროს.

ახლა დაძაბულობა მაისში დაიწყო, როცა კამბოჯელი ჯარისკაცი მოკლეს.

ამჯერად ბრძოლა კამათის საგნად ქცეული ტა მოან თომის ტაძრის მახლობლად დაიწყო, ბანგკოკიდან დაახლოებით 360 კმ-ში.