"უკრაინელები რუსული ტყვეობიდან სახლში ბრუნდებიან," — უკრაინის პრეზიდენტი ვოლოდიმირ ზელენსკი სოციალურ ქსელში წერს, რომ ტყვეების გაცვლა დაიწყო.

მისი განცხადებით, დღეს რუსული ტყვეობიდან დაბრუნებულთა კატეგორიებს შორის არიან მძიმედ დაშავებულები და 25 წლამდე პირები.

"პროცესი საკმაოდ რთულია, ბევრი მგრძნობიარე დეტალია, მოლაპარაკებები პრაქტიკულად ყოველდღე გრძელდება.

ჩვენ ველით, რომ სტამბოლში შეხვედრაზე მიღწეული ჰუმანიტარული შეთანხმებები სრულად შესრულდება. ჩვენ ყველაფერს ვაკეთებთ ყველას დასაბრუნებლად. ამისთვის ყველა დონეზე ვმუშაობთ. ყველა, ვინც ტყვეობაშია, სახლში უნდა დავაბრუნოთ. მადლობა ყველას, ვინც გვეხმარება", — წერს ვოლოდიმირ ზელენსკი Facebook-ზე.