მზია ამაღლობელის საქმის პროკურორის, თორნიკე გოგეშვილის თქმით, "დაზარალებული" დგებუაძე თანახმაა ამაღლობელთან საპროცესო შეთანხმება გაფორმდეს. საპროცესო შეთანხმება გულისხმობს, რომ მზია ამაღლობელმა "აღიაროს" პოლიციელზე თავდასხმა და ამ შემთხვევაში, მას სასჯელი შეუმსუბუქდება.

"მათი მზადყოფნის შემთხვევაში ჩვენ მზადყოფნას გამოვთქვამთ განვიხილოთ [საპროცესო შეთანხმება]" — თქვა გოგეშვილმა.

საქმის მეორე პროკურორმა, შოთა ჩხაიძემ განაცხადა, რომ "უტყუარად დასტურდება" მზია ამაღლობელის ჩადენილი დანაშაული და ამის უკან შურისძიების მოტივი იდგა. ჩხაიძემ შემდეგ დასძინა, რომ ამაღლობელს "კანონით გათვალისწინებული სასჯელი" უნდა დაენიშნოს.

"უტყუარად დასტურდება რომ მზია ამაღლობელმა შურისძიების მიზნით განახორციელა თავდასხმა ირაკლი დგებუაძეზე. სასამართლო პროცესზე დადგინდა, რომ მზია ამაღლობელმა ჩაიდინა დანაშაული. შესაბამისად, მას უნდა დაენიშნოს კანონით გათვალისწინებული სასჯელი," — თქვა ჩხაიძემ.

მზია ამაღლობელის ადვოკატის, მაია მწარიაშვილის განმარტებით, პროკურატურა საპროცესო გარიგების ხსენებით, კლასიკურ ხერხს მიმართავს, როდესაც სასამართლო ვერ უმტკიცებს ბრალდებულს დანაშაულს, ზეწოლის ამ ხერხებით ცდილობენ აღიარებითი ჩვენება მოიპოვონ.

"აღიარე, ეს ყველაფერი, რაც დაგაბრალეს, რომ ვითომ პოლიციელებს აყენებდი შეურაცხყოფას, ვითომ ვიღაცების დაკავებაში ხელს უშლიდი, შემდეგ თავდასხმა განახორციელე დავალებით, ეს ყველაფერი აღიარე, და ვიფიქრებთ სასჯელის შემსუბუქებაზეო.

ბრალდებამ შესთავაზა, ყველაფერი დაიბრალე, რაც ჩვენ ვერ დავადასტურეთ და მერე ვიფიქრებთ სასჯელის შემსუბუქებაზეო.

მეტი ზეწოლა რა უნდა იყოს? — განაცხადა მწარიაშვილმა.

"ნეტგაზეთის" ცნობით, მზია ამაღლობელი არ აპირებს საპროცესო გარიგებაზე დათანხმებას და ირაკლი დგებუაძის "დაზარალებულად" ცნობას.

შეგახსენებთ, მზია ამაღლობელს ბრალი სისხლის სამართლის კოდექსის 353-ე პრიმა მუხლის პირველი ნაწილით წარუდგინეს, რაც პოლიციელზე თავდასხმას გულისხმობს. მუხლი 4-დან 7 წლამდე პატიმრობას ითვალისწინებს.

დღევანდელ პროცესზე დაცვის მხარის მოწმე, ექსპერტი, ექიმი-ნევროლოგი ნათია ხარატი დაიკითხა.

ამაღლობელის ადვოკატმა, მაია მწარიაშვილმა მოწმის დაკითხვამდე მისი ჩატარებული ექსპერტიზის დასკვნა წაუკითხა პროკურორებს. ექსპერტმა დგებუაძის ინტერვიუ გაანალიზა, რომელიც სილის გაწვნიდან, რამდენიმე წუთში არის გადაღებული. ექსპერტმა სასამართლო პროცესზე ასევე დასძინა, რომ ამაღლობელს ადმინისტრაციული დაკავების შემდეგ ხელზე დაზიანება ჰქონდა მიღებული, რაც ჩალურჯებით იყო გამოხატული. ექსპერტმა ხაზი გაუსვა, რომ ამაღლობელი დაზიანებული ხელით, ვერ შეძლებდა დგებუაძისთვის ტკივილს გამომწვევი სილის გაწვნას.