სოციალური ქსელის, ოსკაროსანი დრამის, რომელიც Facebook-ის შექმნის შესახებ მოგვითხრობს, გაგრძელების შესაძლებლობაზე წლების განმავლობაში ვისმენდით ჭორებს, თუმცა ახლა დადასტურებულად ვიცით, რომ მალე ფილმის მეორე ნაწილს დიდ ეკრანებზე ვიხილავთ.

გამოცემა Deadline-ის ინფორმაციით, ფილმის რეჟისორი აარონ სორკინი იქნება. შიდა წყაროების მიხედვით, მიუხედავად იმისა, რომ ფილმს სოციალური ქსელის მეორე ნაწილს უწოდებენ, ის არა სიუჟეტის პირდაპირი გაგრძელება, არამედ ორიგინალი ფილმის შემდგომი ნაწილია.

ახალი ფილმი ახლა განვითარების პროცესშია და მის პროდიუსერებად სახელდებიან ტოდ ბლეკი, პიტერ რაისი, სორკინი და სტიუარტ ბესერი.

სორკინის ორიგინალური სცენარი ეფუძნება Wall Street Journal-ის ჟურნალისტის, ჯეფ ჰოროვიცის სერიას "Facebook-ის ფაილები" (The Facebook Files) — სკანდალურ სტატიებს, რომლებიც 2021 წლის ოქტომბერში გამოქვეყნდა და ამხილა სოციალური ქსელის შიდა მექანიზმები და ზიანი, რომელსაც ის მომხმარებლებსა და საზოგადოებას აყენებდა.

ფილმი სოციალური ქსელი Sony Pictures-მა 2010 წელს გამოუშვა და იგი ბენ მეზრიჩის წიგნს, შემთხვევით მილიონერებს ეფუძნებოდა. ფილმმა დიდი წარმატება მოიპოვა როგორც მაყურებლებში, ისე კრიტიკოსებში, და $226 მილიონი გამოიმუშავა გლობალურად. ის რვა ოსკარზე იყო ნომინირებული, მათ შორის საუკეთესო ფილმის ნომინაციაში, ხოლო სამი ჯილდო მოიპოვა, მათ შორის საუკეთესო ადაპტირებული სცენარისთვის, რაც სწორედ სორკინს ერგო.

წყაროები ხაზგასმით აღნიშნავენ, რომ ახალი ფილმი "6 იანვრის მოვლენებზე" არ იქნება (2021 წლის 6 იანვარს, როდესაც დონალდ ტრამპი საპრეზიდენტო არჩევნებში დამარცხდა, მისი მხარდამჭერები კაპიტოლიუმის შენობაში შეცვივდნენ და არაერთი დანაშაული ჩაიდინეს) — ის არ შეეხება მხოლოდ 2020 წლის არჩევნებს, არამედ ასევე ფოკუსირდება Facebook-ის გავლენაზე თინეიჯერებზე, ბავშვებზე, ძალადობაზე და აშშ-ის გარეთ მდებარე ქვეყნებზე.

მიუხედავად იმისა, რომ ორიგინალი ფილმი დევიდ ფინჩერმა გადაიღო, ახალ პროექტში რეჟისორის როლი თავად სორკინს ექნება, რომელმაც უკანასკნელ წლებში რეჟისორული უნარები განივითარა. მისი ბოლო რეჟისორული ნამუშევრებია Molly’s Game, The Trial of the Chicago 7 და Being the Ricardos. ჯერ არ არის ცნობილი, როდის დაიწყება გადაღებები, თუმცა ცნობილია, რომ უკვე შედგა ფილმთან დაკავშირებული რამდენიმე მნიშვნელოვანი გარიგება და ახლა სორკინი შესაბამისი მსახიობების შერჩევაზეა გადართული. თუ გავიხსენებთ, როგორ დაეხმარათ ფილმის პირველი ნაწილი ჯესი აიზენბერგსა და ენდრიუ გარფილდს პოპულარობის მოპოვებაში, მოსალოდნელია, რომ ჰოლივუდის ყველა აგენტი ეცდება, თავისი ამომავალი ვარსკვლავები სორკინის წინაშე წარადგინოს.

რაც შეეხება ჯესი აიზენბერგს, რომელიც Facebook-ის დამფუძნებლის, მარკ ზაკერბერგის როლისთვის ოსკარზე იყო ნომინირებული, ამ დროისთვის უცნობია, რა როლი ექნება მას ახალ ისტორიაში ან ჰქონდა თუ არა სორკინს მასთან კონტაქტი ამ როლის გასამეორებლად. თუმცა, ძნელი წარმოსადგენია, რომ Facebook-ის შესახებ გადაღებულ ახალ ფილმში მარკ ზაკერბერგი საერთოდ არ გამოჩნდეს.