განათლების სამინისტრო ტყიბულის რაიონში, სოფელ მუხურას საჯარო სკოლაში ქართული ოცნების დროშის დაკიდების საკითხს შეისწავლის. ამის შესახებ On.ge-ს განათლების სამინისტროში ევროპული საქართველოს წევრის, ოთარ კახიძის მიერ გავრცელებული ფოტოების ნახვის შემდეგ განუცხადეს.

"ზოგადი განათლების შესახებ კანონის თანახმად, სკოლა თავისუფალი უნდა იყოს პოლიტიკისა და პოლიტიკური აგიტაციისგან, შესაბამისად ამ ფოტოების ავთენტურობას მოიკვლევს სამინისტროს შიდა აუდიტის დეპარტამენტი და თუ დადასტურდა სკოლის ტერიტორიაზე დროში არსებობა, სამინსტრო შესაბამის ზომებს მიიღებს", - აცხადებენ სამინისტროში.

ფოტო: ოთარ კახიძე

წელს სკოლაში ქართული ოცნების დროშების გამოყენების ეს პირველი შემთხვევა არაა. შუახევის მუნიციპალიტეტის სოფელ სხეფის საჯარო სკოლის მასწავლებელმა, მარინა დარჩიძემ ფეისბუკით ფოტო გაავრცელა, სადაც პირველი კლასის მოსწავლეები მმართველის პარტიის - ქართული ოცნების დროშებით არიან გადაღებული.