გაეროს გენერალური მდივანი, ანტონიო გუტერეში, X-ზე ამერიკის შეერტებული შტატების მხრიდან ირანის დაბომბვას ეხმაურება. მისი აზრით, აშშ-ს ნაბიჯი მთელი მსოფლიოსთვის საშიშია და მოვლენები, შესაძლოა, მალე კონტროლიდან გამოვიდეს. გუტერეში ასევე მიიჩნევს, რომ ერთადერთი გამოსავალი დიპლომატიაა და მოუწოდებს აშშ-ს, რომ იმოქმედოს საერთაშორისოდ დადგენილი კანონების შესაბამისად.

"დღეს ირანის წინააღმდეგ შეერთებული შტატების მიერ ძალის გამოყენებამ სერიოზულად შემაშფოთა. ეს არის ისედაც ზღვარზე მყოფ რეგიონში სახიფათო ესკალაცია და საერთაშორისო მშვიდობისა და უსაფრთხოებისთვის პირდაპირი საფრთხე. არსებობს მზარდი რისკი, რომ ეს კონფლიქტი სწრაფად გამოვიდეს კონტროლიდან, რაც კატასტროფულ შედეგებს გამოიწვევს მშვიდობიანი მოსახლეობისთვის რეგიონსა და მსოფლიოში. მოვუწოდებ წევრ სახელმწიფოებს დეესკალაციისკენ და გაერო-ს წესდებითა და საერთაშორისო სამართლის სხვა წესებით ნაკისრი ვალდებულებების შესრულებისკენ. ამ სახიფათო დროს კრიტიკულად მნიშვნელოვანია ქაოსის სპირალის თავიდან აცილება. სამხედრო გადაწყვეტა არ არსებობს. ერთადერთი გზა წინსვლისთვის დიპლომატიაა. ერთადერთი იმედი მშვიდობაა," — წერს გუტერეში (პირველი არხის თარგმანი)

ცნობისთვის, შეერთებულმა შტატებმა 22 ივნისს ირანში სამ ძირითად ბირთვულ ობიექტზე, ფორდოუზე, ისპაჰანსა და ნათანზიზე, იერიში მიიტანა, რომლის შედეგადაც The Times of Israel-ის ცნობით, 86 ადამიანი დაშავდა. ატომური ენერგიის საერთაშორისო სააგენტოს ცნობით, დაბომბვის შედეგად ირანის ბირთვულ ობიექტებზე რადიაციის დონე არ გაზრდილა.