რამდენიმე დღის წინ ემის 69-ე ცერემონიაზე HBO-ს შოუმ Big Little Lies ნამდვილი ფურორი მოახდინა. გარდა იმისა, რომ ნიკოლ კიდმანმა და ლორა დერნმა მსახიობი ქალის ნომინაციებში გაიმარჯვეს, შოუმ საუკეთესო მინი-სერიალის ნომინაციაში ემის ჯილდოც მიიღო.

ამ გამარჯვების შემდეგ პრესა კიდევ ერთხელ ალაპარაკდა იმაზე, რომ HBO-მ შესაძლოა Big Little Lies მეორე სეზონი გადაიღოს. ამ ეჭვებს კიდევ უფრო ამძაფრებდა ლიან მორიარტის მიერ ჟურნალსიტებთან გაკეთებული კომენტარი.

"მეორე სეზონზე ვფიქრობ, ეს გამარჯვება დიდი მოტივი და მსვენიერი შესაძლებლობა იქნებოდა. სულ ეს არის რისი თქმაც ახლა შემიძლია", - თქვა ემის შემდეგ გამართულ პრესკონფერენციაზე მწერალმა.

ამავე თემაზე აქტიურად საუბრობენ მსახიობები. მაგალითად, რიზ უიზერსპუნი ამბობს, რომ მზად არის მეორე სეზონში დასაბრუნებლად.

"ვესაუბრეთ წიგნის ავტორს, ლიან მორიარტს და მან გვითხრა, რომ ახალ ისტორიაზე ფიქრობს. ყველაფერი მისი შექმნილია, ეს პერსონაჟები, ეს ისტორია, მედელინი, სელესტი, რენატა, მისგან დაიბადნენ და ახლა ყველაფერი მხოლოდ მასზეა დამოკიდებული", - ამბობს რიზი.

მეორე სეზონთან დაკავშირებით საკუთარ პოზიციას ამხელს ნიკოლ კიდმანიც:

"რიზი [უიზერსპუნი], მე და ლორა დერნი ძალიან დიდ დროს ვატარებთ ერთად, ხანდახან ღამეებსაც კი ვათენებთ ერთმანეთთან საუბარში. ჩვენ მზად ვართ დიდი პატარა ტყუილები ეკრანზე დაბრუნდეს, თუმცა პირველი სეზონი წიგნის ეკრანიზაცია იყო. ვიცოდით, რომ ისტორიაც აქ სრულდებოდა. ახლა, როცა საუბარია მეორე სეზონზე, ვერც ერთი ჩვენგანი ვერ ხვდება თუ როგორ შეიძლება ამ არაჩვეულებრივი ქალების ისტორია გაგრძელდეს", - ამბობს კიდმანი.

სწორედ ამ არაჩვეულებრივი პერსონაჟების სამომავლო ბედზე ისაუბრა ცოტა ხნის წინ HBO-ს პროგრამების განყოფილების უფროსმა ქეისი ბლოისმა.

"ჩვენ ვესაუბრეთ ლიან მორიარტს და ვფიქრობთ თუ როგორ შეიძლება გაგრძელდეს ეს ისტორია, რაზე მოხერხდება აქცენტების გაკეთება იმ შემთხვევაში თუ ახალი სეზონი დამტკიცდება. გარკვეული შეთანხმებები უკვე არსებობს, მაგალითად წიგნში ბონის [ზოი კრავიცი] ისტორია კარგად არის გაშლილი და ახალი სეზონის აქცენტები მასზე შეიძლება გაკეთდეს, ასევე იმაზე თუ რას აკეთებს ახლა სელესტი? რას საქმიანობს, როგორ ცხოვრობს, როგორ ცდილობს დაძლიოს ტრავმები და ა.შ.", - ამბობს ბლოისი.

მისი აზრით სერიალში აქცენტის გაკეთება ლორა დერნის პერსონაჟზე რენატაზეც შეიძლება.

"წიგნისგან განსხვავებით ჩვენ შოუში ნაკლები დრო დაეთმო რენატას პერსონაჟს და მაყურებელმა ბოლომდე ვერ იგრძნო მისი განცდები, ბოლომდე არ იცის მისი ცხოვრება და ვფიქრობ, ესეც მშვენიერი მასალა იქნება ჩვენთვის", - ამატებს ქეისი ბლოისი.

ასე, რომ ისღა დაგვრჩენია დაველოდოთ, რას გადაწყვეტს ავტორი, სხვა ყველა - არხით დაწყებული და მსახიობებით დამთავრებული ახალი სეზონისთვის მზად არიან.