მასწავლებლის ეროვნული ჯილდო, რომელიც 2017 წელს დაარსდა, არა მხოლოდ, ცალკეული მასწავლებლების მიღწევების დაფასებას ისახავს მიზნად, არამედ, განათლების სფეროში ჩართულ ადამიანებს პროფესიული გამოცდილების გაზიარებას საშუალებასაც აძლევს — კონკურსის მეშვეობით, მასწავლებლები უკეთ იცნობენ ერთმანეთს, კოლეგებს უზიარებენ საკუთარ აღმოჩენებს, ცოდნასა და სწავლის მეთოდებს. პროექტის მთავარი მხარდამჭერი საქართველოს ბანკია.

მიხეილ ლაბარტყავა სწორედ ერთ-ერთი გამორჩეული პედაგოგი და მასწავლებლის ეროვნული ჯილდოს ათეულთა კლუბის წევრია. მისი საქმიანობა მხოლოდ პედაგოგობით არ შემოიფარგლება და მრავალგვარ პროფესიულ მიღწევას მოიცავს. ის ერთდროულად გამოცდილი მკვლევარ-მეცნიერი, უნივერსიტეტის ასოცირებული პროფესორი, USAID-ის ექსპერტი და მრავალი კვლევითი პროექტისა და ინიციატივის აქტიური მონაწილეა. ყოველივე ამასთან ერთად, მისი მთავარი ინტერესი მაინც მოსწავლეებთან ურთიერთობაა. ის სკოლაში ქიმიის პედაგოგადაც მუშაობს.

ცოდნის გაზიარება

ბატონ მიხეილს ბავშვობაში ძალიან კარგი ქიმიის მასწავლებლები ჰყავდა. სწორედ მათ შეაყვარეს ეს საგანი იმდენად, რომ საბოლოოდ მთელი ცხოვრება ქიმიას მიუძღვნა. წლების შემდეგ მიხეილი უკვე თავად ცდილობდა ქიმიის განსაკუთრებული მნიშვნელობა თავისი მოსწავლეებისთვის გაეზიარებინა. სკოლაში მისი და მოსწავლეების ინიციატივით, დამატებით საკვირაო გაკვეთილებსაც ატარებენ. ასევე, აქტიურად მონაწილეობენ სხვადასხვა სამეცნიერო კონკურსში, ხშირად პირველი ადგილიც მოუპოვებიათ.

ამჟამად, მისი ყოფილი მოსწავლეები სხვადასხვა ქვეყნის, პრესტიჟულ უნივერსიტეტებში აგრძელებენ სწავლას. მიხეილ ლაბარტყავასთვის, როგორც მასწავლებლისთვის, მთავარი სიხარულიც სწორედ ისრის, რომ მისი მოსწავლეები ქიმიას ირჩევენ პროფესიად და წარმატებულ კარიერასაღწევენ.

“ქიმია ერთ-ერთი ისეთი მეცნიერებაა, რომელიც ბავშვის ცნობისმოყვარეობას აბსოლუტურად აკმაყოფილებს. ამჟამად ჩვენს სკოლაში ოთხი კვლევითი ჯგუფია შექმნილი. ყველას ცალ-ცალკე სამუშაო აქვს განაწილებული. მასალა, რომელსაც ისინი დამატებით გაკვეთილებზესწავლობენ, სასკოლო პროგრამას ემთხვევა. ბავშვებს ძალიან აინტერესებთ ეს ყველაფერი და იმდენად არიან ჩართული პროცესში, რომ საბოლოოდ კედლის გაზეთიც კი გამოვუშვით — ,ყოველდღიური ქიმია. გაზეთი, რომელიც თვეში ორჯერ გამოიცემა შეეხება ისეთ თემებს, რომლებიც ბავშვებს უკეთ დაანახებს ქიმიის მნიშვნელობას ყოველდღიურ ცხოვრებაში.“

რატომ არის ქიმია მნიშვნელოვანი

ხშირად ბავშვები ბოლომდე ვერ ხვდებიან ქიმიის საჭიროებას. როგორც ბატონი მიხეილი აღნიშნავს, თანამედროვე სამყაროში ჩვენ ქიმიურ გარემოში ვცხოვრობთ, ამიტომ შეუძლებელია გვერდი აუარო მას. ქიმიას ბევრი სარგებლიწს მომტანი, მაგრამ ამასთანავე, შესაძლოა უარყოფითი გავლენაც მოახდინოს ჩვენზე. იმისთვის, რომ ბავშვებმა მეტად გააცნობიერონ, როგორც ქიმიის, ისე ფიზიკის, ბიოლოგიისა და სხვა სამეცნიერო დარგების მნიშვნელობა, აუცილებელია, რომ საგანი მეტად ხელშესახები და პრაქტიკული გახდეს. მიხეილის გაკვეთილებიც სწორედ ამ მიზანს ემსახურება.

”იმისთვის რომ, ბავშვი დაინტერესდეს ქიმიით, აუცილებელია ლაბორატორიული სამუშაოების ჩატარება, ოღონდ ამ სამუშაოს არ უნდა ჰქონდეს ფორმალური ხასიათი. მიზანი უნდა იყოს ის, რომ ბავშვმა შეძლოს ცოდნის რეალური გამოყენება. ჩვენი დამატებითი გაკვეთილების მიზანიც სწორედ ეს არის. მაგალითად, მოსწავლეებს ბევრი რამ გაუგიათ c ვიტამინის შესახებ სახელმძღვანელოებიდან, თუმცა, სხვა არის, როდესაც c ვიტამინს აფთიაქში ყიდულობ და სულ სხვაა, როცა მას სხვადასხვა ხილიდან ან ბოსტნეულიდან გამოყოფ. მსგავსი ექსპერიმენტის შემდეგ, მოსწავლემ უკვე იცის, რომ როდესაც ის ამა თუ იმ მცენარით იკვებება, შესაბამის ნივთიერებასაც იღებს.”

მასწავლებლის ეროვნული ჯილდო

დღეს, მასწავლებლის პროფესია ნაკლებად დაფასებულია იმ შრომასთან და ცოდნასთან შედარებით, რომელსაც პედაგოგები ყოველდღიურად გასცემენ. თუმცა, ეს ტენდენცია ნელ-ნელა იცვლება, რაც მასწავლებლის ეროვნული ჯილდოს დამსახურებაა, რომელიც უკვე მე-9 წელია ტარდება.

”მასწავლებელი დიდ დროს უთმობს იმის გაანალიზებას, თუ როგორ ჩაიარა გაკვეთილმადა რა და როგორ უნდა გააკეთოს შემდგომში. ძალიან დიდი ენერგია სჭირდება, რომ მასალა მოამზადოს, ამოცანები შეადგინოს და ა.შ. ეს ყველაფერი დამატებითი შრომაა, რომელიც რეალურად არასდროს ფასდება. მართალია, სკოლაში ყოველდღე მხოლოდ სამ გაკვეთილს ვატარებ, მაგრამ, გაკვეთილების დასრულების შემდეგ ბავშვებთან ერთად ხშირად დამატებით 5-6 საათსაც ვმუშაობ.”

მასწავლებლის ეროვნული ჯილდოს კონკურსის ფარგლებში, განაცხადების მიღება უკვე დასრულდა. წელს ჯილდოზე განაცხადი 142-მა მასწავლებელმა შეავსო, ხოლო ნომინირება 2 455 მასწავლებელს გაუწიეს. ახლა აპლიკაციების ტექნიკურად შემოწმება მიმდინარეობს. ივნისის ბოლოს კი, მასწავლებელთა ათეული გამოვლინდება, რის შემდეგაც ფინალურ ტურში 5 მასწავლებელი გადავა. 5 ოქტომბერს — მასწავლებლის მსოფლიო დღეს კი, კონკურსის გამარჯვებული გამოვლინდება.

ჯილდოს შესახებ დამატებითი დეტალები შეგიძლიათ, იხილოთ ვებ-გვერდზე.

ინფორმაციისთვის, მასწავლებლის ეროვნული ჯილდო საქართველოში 2017 წლის 13 მაისს დაწესდა. ინიციატივა გლობალური კამპანია — The Global Teacher Prize-ის ნაწილია, რომლის მიზანიც მასწავლებლების პროფესიის პოპულარიზაციაა. მასწავლებლის ეროვნული ჯილდოს მხარდამჭერები არიან: მთავარი მხარდამჭერი — საქართველოს ბანკი; გენერალური სპონსორი — გუდავაძე-პატარკაციშვილის ფონდი.