შენების მოძრაობის თბილისის მერობის კანდიდატი, თენგიზ შერგელაშვილი 400 ათასი თბილისელისთვის, რომელთაც საყოველთაო ჯანდაცვის პროგრამაში შესული ცვლილებები შეეხო და დაფინანსება შეუმცირდა, დაზღვევისთვის ბიუჯეტიდან 50 მლნ ლარის გამოყოფას გეგმავს.

"მოსახლეობა დაუფინანსებელი ნაწილის თანადაფინანსებას ან საკუთარი ჯიბიდან ახდენს ან მიმართვას რაიონულ გამგეობას... არ არსებობს არანაირი კრიტერიუმი თუ რა შემთვევაში უნდა გამოიყოს დაფინანსება, რა ოდენობით და ა.შ. მსგავსი საკითხის მოუწესრიგებლობა ხელს უწყობს ბიუჯეტის უსისტემო ხარჯვას და შესაძლოა გამოყენებულ იქნას ამომრჩევლის მოსყიდვისთვის."

თენგიზ შერგელაშვილის განცხადებით დაზღვევის სისტემა, რომელიც მისი მერობის შემთხვევაში ამოქმედდება მოსახლეობას შეუვსებს საყოველთაო ჯანდაცვის კომპონენტს და ხელს შეუწყობს სადაზღვევო ინდუსტრიის განვითარებას:

"ჩვენი პროგრამა გულისხმობს სადაზღვევო კომპონენტის შემოტანას, რომელიც შეეხება ოთხი კატეგორიის მოსახლეობას: სოციალურად დაუცველი ოჯახებს, 6-17 წლის მოზარდებს, წლიური 40 000 ლარამდე და თვეში 1000 ლარი და მეტი შემოსავლის მქონე პირებს და თვეში 1000 ლარზე ნაკლები შემოსავლის მქონე პირებს."

თბილისის მერობის კანდიდატის თქმით, დაზღვევა სოციალურად დაუცველი ოჯახებისა და 6-17 წლის მოზარდებისთვის 100 პროცენტით შეავსებს საყოველთაო ჯანდაცვის პროგრამის დაუფინანსებელ ნაწილს, ხოლო დანარჩენ ორ კატეგორიას სადაზღვევო პრემიის ნაწილში თანადაფინანსება ექნებათ.