შინაგან საქმეთა სამინისტროს თანამშრომლებმა ნარკოდანაშაულისთვის ერთი პირი სოფელ ფონიჭალაში დააკავეს. ამის შესახებ ინფორმაციას უწყების პრესსამსახური ავრცელებს.

როგორც შსს-ში აცხადებენ, სამართალდამცველებმა, დაკავებულის პირადი და საცხოვრებელი სახლის ჩხრეკისას, 43 შეკვრად დაფასოებული ნარკოტიკული საშუალება ამოიღეს, რომელზეც დანიშნულია შესაბამისი ექსპერტიზა.

"გამოძიებამ დაადგინა, რომ ბრალდებული ნარკოტიკულ საშუალებას სისტემატურად ყიდდა. პოლიციამ დაკავებულის მიერ გაყიდული, სამ შეკვრად დაფასოებული 0,0952 გრამი ჰეროინი ნივთმტკიცებად ამოიღო", - დასძენენ შსს-ში.

საქმეზე გამოძიება სისხლის სამართლის კოდექსის 260-ე მუხლის მეოთხე ნაწილით მიმდინარეობს. ამ მუხლით ნარკოტიკული საშუალების, მისი ანალოგის, პრეკურსორის ან ახალი ფსიქოაქტიური ნივთიერების უკანონო გასაღება ისჯება თავისუფლების აღკვეთით ვადით ექვსიდან თერთმეტ წლამდე.