ინფორმაციის თავისუფლების განვითარების ინსტიტუტი მიიჩნევს, რომ საზოგადოებრივი მაუწყებლის მიერ გამოცხადებულ ტენდერებში პრობლემატური მონაწილეთა დაბალი მაჩვენებელი და ორეტაპიანი ტენდერების გამოუყენებლობაა. ორგანიზაცია ამას მაუწყებლის მიერ 2017 წლის პირველ ცხრა თვეში გამოცხადებული ტენდერების ანალიზზე დაყრდნობით ასკვნის.

ინფორმაციის თავისუფლების განვითარების ინსტიტუტმა ამავე პერიოდში გამოცხადებული ტენდერებით მაუწყებლის მიერ დაზოგილი თანხაც დათვალა. ორგანიზაციის მონაცემებით, ცხრა თვეში 830 350 ლარი დაიზოგა, რაც 11,25 პროცენტიანი დანაზოგია.

"აღნიშნული ინფორმაცია კიდევ ერთხელ უსვამს ხაზს, თუ რამდენად მნიშვნელოვანია სახელმწიფო შესყიდვების შესახებ კანონი მაქსიმალურად ვრცელდებოდეს საზოგადოებრივ მაუწყებელზე, რაც მაუწყებლის საქმიანობის ეფექტიანობას და გამჭვირვალობას უზრუნველყოფს", - აღნიშნავენ ორგანიზაციაში.

საქართველოს პარლამენტში მაუწყებლობის შესახებ კანონში შესატანი ცვლილებების პროექტი განიხილება, რომლის მიღების შემთხვევაშიც საზოგადოებრივი მაუწყებელი ნაწილობრივ გათავისუფლდება ტენდერების გამოცხადების ვალდებულებისგან.