სენატმა მხარი დაუჭირა უკრაინისთვის ლეტალური იარაღით დახმარების პროექტს. ამის შესახებ ინფორმაციას უკრაინის პრეზიდენტი პეტრო პოროშენკო ფეისბუკის პირად გვერდზე ავრცელებს.

სენატის მიერ მხარდაჭერილი კანონპროექტი უკრაინისთვის 500 მილიონი დოლარის დახმარების გამოყოფას გულისხმობს. დოკუმენტით გათვალისწინებულია უკრაინისთვის ლეტალური და თავდაცვითი შეიარაღებით დახმარება.

პოროშენკოს მიერ ფეისბუკზე გამოქვეყნებულ განცხადებაში ვკითხულობთ: "პირველად, საკანონმდებლო დონეზე მიღებული გადაწყვეტილებით, ჩვენ მივიღებთ ისეთ თავდაცვით შეიარაღებას, როგორიცაა: რადიოლოკაციური საშუალებები, საჰაერო თავდაცვითი შეიარაღება, ასევე, მოგვეცემა საშუალება, ვაკონტროლოთ ჩვენი საზღვაო აკვატორია, გადმოგვეცემა სამხედრო-საზღვაო ნაღმსაწინააღმდეგო მოწყობილობები, ასევე, ახლო მოქმედების და სანაპირო დაცვის გემები."

წინა დღით ვესტ-პოინტში გამართულ მიღებაზე გამოსვლისას უკრაინის პრეზიდენტმა განაცხადა, რომ უკრაინა აფასებს აშშ-ს თანადგომას.

გადაწყვეტილება სენატმა 18 სექტემბერს მიიღო. გარდა ფინანსური დახმარებისა, კანონპროექტით ასევე გათვალისწინებულია დაშავებული უკრაინელი სამხედროების უფასო მკურნალობა აშშ-ს კლინიკებში.