ტვ პირველის ჟურნალისტი მარიამ მაკასარაშვილმა განაცხადა, რომ ქვემო ქართლის გადამდგარი ვიცეგუბერნატორის, გიორგი შინჯიკაშვილის მამამ მას ინტერვიუს შემდეგ ტელეფონი წაართვა და შემდეგ ფიზიკურად გაუსწორდა.

ჟურნალისტის განცხადებით, ის და ტვ პირველის ოპერატორი გიორგი შინჯიკაშვილის საცხოვრებელ სახლთან იმყოფებოდა და გადამდგარი ვიცეგუბერნატორის თანამდებობიდან წასვლის შესახებ შეკითხვებს შინჯიკაშვილის მამას უსვამდნენ. ინტერვიუს დასრულების შემდეგ შინჯიკაშვილის მამა მოულოდნელად აგრესიული გახდა და ფიზიკურად იძალადა ჟურნალისტზე და ოპერატორზე.

"ვიმყოფებოდით გიორგი შინჯიკაშვილის საცხოვრებელ სახლში. მას შემდეგ მოვედით აქ, რაც ვიცეგუბერნატორმა სოციალურ
ქსელში გაავრცელა ინფორმაცია იმის შესახებ, რომ ის ტოვებდა თანამდებობას.
ბუნებრივია, მასთან არსებობდა კითხვები და სწორედ ამ კითხვების დასასმელად მოვედით მის საცხოვრებელ სახლში, სადაც იმყოფებოდნენ გიორგი შინჯიკაშვილის ოჯახის წევრები. ჩვენ გვქონდა კომუნიკაცია მის მამასთან, ჩავწერეთ ინტერვიუ და მამამ თქვა, რომ რამდენიმე წამის წინ გაიგო ეს ინფორმაცია, რომ მისმა შვილმა დატოვა თანამდებობა.

როდესაც ჩვენ ვტოვებდით მიმდებარე ტერიტორიას და ვიღებდით მასალას, გიორგი შინჯიკაშვილის მამა მოულოდნელად გახდა აგრესიული ჩემი და ჩემი ოპერატორის მიმართ.

ის გადავიდა ფიზიკურ ანგარიშსწორებაზე — თავდაპირველად ჩემს ოპერატორს წაართვა ტელევიზიის კუთვნილი აპარატურა, კამერა, რომლითაც ვიღებდით, ვწერდით ამ ინტერვიუს. ამის შემდეგ, როდესაც დამინახა, რომ ოპერატორის გვერდით ვიდექი და ხელში მეჭირა ჩემი კუთვნილი მობილური, ეს მობილურიც გამომართვა და გადავიდა ფიზიკურ ანგარიშსწორებაზე, ხელიც კი გამარტყა გიორგი შინჯიკაშვილის მამამ,” — ამბობს ჟურნალისტი.

ტვ პირველის ინფორმაციით, ჟურნალისტმა მომხდარიდან მალევე გამოიძახა პოლიცია, მაგრამ სამართალდამცავები ადგილზე კვლავ არ მისულან.

შეგახსენებთ, ქვემო ქართლში სახელმწიფო რწმუნებულის პირველი მოადგილე გიორგი შინჯიკაშვილი თანამდებობიდან გადადგა. გასულ წელს, მედიაში გავრცელდა ინფორმაცია იმის შესახებ, რომ შინაგან საქმეთა სამინისტროს განსაკუთრებულ დავალებათა დეპარტამენტის დირექტორ ზვიად ხარაზიშვილსა ("ხარებასა") და გიორგი შინჯიკაშვილს შორის ფიზიკური დაპირისპირება მოხდა, რა დროსაც მძიმე დაზიანებები მიიღო "ხარებას" მოადგილემ.