შეიძლება არ იცოდეთ, რომ Amazon-ის დამფუძნებელი ჯეფ ბეზოსი ასევე ფლობს საჰაერო-კოსმოსური ტექნოლოგიების კომპანიას Blue Origin. კომპანიის მორიგი კოსმოსური მისია კი ნამდვილად ვარსკვლავურ ეკიპაჟს გააერთიანებს. ხომალდის ბორტზე ექვსი ქალი იქნება, მათ შორის, პოპვარსკვლავი კეტი პერი, ტელეწამყვანი გეილ კინგი და ბეზოსის საცოლე, ჟურნალისტი ლორენ სანჩესი. მათ ასევე შეუერთდებიან კოსმოსური ინჟინერი აიშა ბოუი, სამოქალაქო აქტივისტი ამანდა ნუენი და კინოპროდიუსერი კერიენ ფლინი.

როგორც Blue Origin-ის განცხადებიდან ვიგებთ, მისიის ინიციატივა სანჩესს ეკუთვნის. სწორედ ის უწინამძღოლებს ეკიპაჟს. კომპანიის ცნობით, მისია ბორტზე მყოფებს "სხვაგვარად დაანახვებს დედამიწას და უბიძგებს საკუთარი ამბების მოყოლისკენ", ეს კი მომავალი თაობებისთვისაც შთამაგონებელი ამბავი გახდება.

"არ ვიცი, როგორ ავხსნა, რომ ერთდროულად დაზაფრული და აღტაცებული ვარ. შვილს რომ ვაჩენდი, მაშინ ვგრძნობდი ასე თავს", — აღნიშნავს გეილ კინგი თავის გადაცემაში. მისი თქმით, გადაწყვეტილების მიღებამდე შვილებსა და თავის კოლეგასა და მეგობარს, ოპრა უინფრის, ესაუბრა.

Blue Origins-ის კოსმოსური ტურისტებისთვის განკუთვნილი კაფსულა

Blue Origins-ის კოსმოსური ტურისტებისთვის განკუთვნილი კაფსულა

ფოტო: Blue Origins

Blue Origin-ისთვის ეს რიგით 31-ე მისია იქნება. აღსანიშნავია, რომ ეს ასევე არის პირველი შემთხვევა 1963 წლის შემდეგ, როცა კოსმოსური ხომალდის ბორტზე მხოლოდ ქალები იქნებიან. მაშინ, ნახევარ საუკუნეზე მეტი ხნის წინ, კოსმოსში საბჭოთა ასტრონავტი ვალენტინა ტერეშკოვა მარტო გაფრინდა.

Blue Origin-ის დამსახურებით, 2021 წელს კანადელი მსახიობი უილიამ შატნერი გახდა ყველაზე ხნიერი ადამიანი, რომელიც კოსმოსში გაფრინდა. შატნერი, რომელიც მაშინ 90 წლის იყო, ავტობიოგრაფიაში აღნიშნავს, რომ გაფრენის შემდეგ ცხოვრებაში ყველაზე დიდი მწუხარება იგრძნო. იმავე წელს, კოსმოსში გაფრინდა თავად ბეზოსიც.