ტელეკომპანია ფორმულა ქართული ოცნების პოლიტსაბჭოს ჩატიდან 2021 წლის 17-18 თებერვლით დათარიღებულ “სქრინებს” აქვეყნებს, სადაც იმაზეა მსჯელობა, ღირს თუ არა ენმ-ს ოფისში შეჭრა და ნიკა მელიას დაკავება.

იმდროინდელი პრემიერმინისტრის, გიორგი გახარიას თქმით, დაუშვებელი ნიკა მელიას ნაციონალური მოძრაობის ოფისში დაკავება, რადგან "დაკავების ოპერაციის არასწორად ჩატარების შემთხვევაში, მელიას გავხდით გმირად და მივცემთ პოლიტიკურ უპირატესობას".

ფორმულას მიერ გავრცელებულ ქართული ოცნების პოლიტსაბჭოს ჩატში ფიგურირებენ: გიორგი გახარია, თეა წულუკიანი, სოზარ სუბარი, თორნიკე რიჟვაძე, მაკა ბოჭორიშვილი და სხვები.

"ამ პირობებში, ოპოზიციური პარტიის შენობის შტურმი უკიდურესად არაგონივრულია და გაუმართლებლად მაღალი რისკების მატარებელია. პოლიციას არ აქვს დახურულ შენობაში ასეთი ტიპის ოპერაციის ჩატარების გამოცდილება, რაც მნიშვნელოვნად ზრდის ოპერაციის ჩატარებასთან დაკავშირებულ რისკებს.

დადასტურებულად შეიძლება ვთქვათ — ძალის გადამეტების ბევრი შემთხვევა გვექნება. ყველას კარგად გვესმის, რომ ასეთ პირობებში ოპოზიციური პარტიის ოფისში სპეცოპერაციის ჩატარება ვერ იქნება შეფასებული პროპორციულ ქმედებად, რასაც მოჰყვება უკიდურესად მწვავე საერთაშორისო რეაქცია.

ვთვლი, რომ ამ ვითარებაში მაღალია იმის ალბათობაც, რომ მელიას დაკავების ოპერაცია წარუმატებელი იქნება და შეიძლება ვერ მოხერხდეს მისი შენობიდან გამოყვანა იქ მყოფების დაზიანების გარეშე. დაკავების ოპერაციის არასწორად ჩატარების შემთხვევაში, მელიას გავხდით გმირად და მივცემთ პოლიტიკურ უპირატესობას, რომელიც დღეს ოპოზიციას უბრალოდ არ გააჩნია. ამავე დროს, არ არსებობს არანაირი აუცილებლობა მელიას დაკავება მოხდეს დაუყოვნებლივ — დღეს ან თუნდაც ხვალ.

ვფიქრობ, ყველას გვმართებს მეტი პასუხისმგებლობა და გონივრულობა. სასამართლოს გადაწყვეტილების აღსრულება უნდა მოხდეს გააზრებულად, რისკების სწორი მართვით და პროპორციული ძალის გამოყენების პრინციპის დაცვით. ამ პოზიციას გამოვხატავ, როგორც პრემიერმინისტრი, რომელიც პასუხისმგებელია აღმასრულებელი ხელისუფლების, მათ შორის, შინაგან საქმეთა სამინისტროს ქმედებებზე, შესაბამისად, დაკავება უნდა მოხდეს მაშინ, როდესაც რისკები იქნება სწორად გააზრებული და მინიმუმამდე დაყვანილი", — წერს გიორგი გახარია.

გიორგი გახარიას მოსაზრებას ეთანხმებიან თეა წულუკიანი და სოზარ სუბარი.

წულუკიანი წერს: "სრულიად ვიზიარებ"; "100% ასეა! ზუსტად ამას ვფიქრობდი დღეს", – წერს სუბარი.

ამის შემდეგ წულუკიანი მელიაზე წერს, რომ "ეგდოს სოროში სანამ არ მოსწყინდება", "აბუჩად არიან ასაგდები. სულელები უნდა ვიყოთ, რომ იქ შევიჭრათ, მათაც ეს უნდათ".

"სქრინების" ტექსტს პუბლიკა ავრცელებს.