პარტია ევროპულმა საქართველომ ნინო ბურჯანაძის პოლიტიკური ძალის მიმართ გამოხატული საჯარო სიმპათიის გამო, ქობულეთის მერობის კანდიდატი ელგუჯა გოგმაჩაძე არჩევნებიდან მოხსნა.

გოგმაჩაძემ ბათუმელებს განუცხადა, რომ ევროპულ საქართველოსა და ბურჯანაძის დემოკრატიულ მოძრაობას ერთნაირი ღირებულებები აქვთ.

ევროპულმა საქართველომ აღნიშნულ ფაქტზე განცხადება გაავრცელა, სადაც წერია:

"დღეს გაზეთმა ბათუმელებმა ევროპული საქართველოს ქობულეთის მერობის კანდიდატთან, ელგუჯა გოგმაჩაძესთან ინტერვიუ გამოაქვეყნა, სადაც გოგმაჩაძემ ნინო ბურჯანაძის პოლიტიკური ძალის მიმართ სიმპათია გამოხატა. ნინო ბურჯანაძის შეხედულებები ფუნდამენტურად შეუთავსებელია ევროპული საქართველოს პოლიტიკურ ღირებულებებსა და პოზიციებთან. ევროპული საქართველოს სახელით ასეთი შეხედულებების მქონე პოლიტიკოსები არჩევნებზე ვერ იბრძოლებენ. ამიტომ პარტიის სამდივნოსა და რეგიონული ორგანიზაციის შეთანხმებით, ელგუჯა გოგმაჩაძე აღარ იქნება 2017 წლის თვითმმართველობის არჩევნებზე ქობულეთის მერობის კანდიდატი. უახლოეს მომავალში პარტია ახალ კანდიდატს წარადგენს".

როგორც ბათუმელები წერს, ელგუჯა გოგმაჩაძე ქობულეთის საკრებულოში ბურჯანაძის პარტიის საშუალებით მოხვდა, თუმცა მოგვიანებით პარტია დატოვა და ამჟამად დამოუკიდებელი დეპუტატის სტატუსი აქვს.