უკრაინის პრეზიდენტმა, ვოლოდიმირ ზელენსკიმ, კომენტარი გააკეთა რუსეთის ფედერაციის პრეზიდენტ პუტინის განცხადებაზე, რომელშიც ამ უკანასკნელმა ისაუბრა აშშ-ისა და უკრაინის შეთავაზებაზე ცეცხლის 30-დღიანი შეწყვეტის შესახებ. ზელენსკის თქმით, პუტინმა ვერ გაბედა, პირდაპირ ეთქვა, რომ ომის დასრულება არ სურს.

"ახლა ჩვენ ყველამ რუსეთიდან პუტინის ძალიან პროგნოზირებადი, ძალიან მანიპულაციური სიტყვები მოვისმინეთ ფრონტზე სიჩუმის იდეაზე საპასუხოდ — ის, ფაქტობრივად, უარს ამზადებს ამ მომენტის მდგომარეობით. პუტინს, რა თქმა უნდა, ეშინია პრეზიდენტი ტრამპისთვის პირდაპირ თქმა, რომ ომის გაგრძელება სურს, უკრაინელების მოკვლა სურს.

და ამიტომ ისინი იქ, მოსკოვში, სიჩუმის იდეას ისეთ წინაპირობებს უწყობენ, რათა საერთოდ არაფერი არ გამოვიდეს ან რაც შეიძლება დიდხანს არ გამოვიდეს", — განაცხადა უკრაინის პრეზიდენტმა.

ზელენსკი აღნიშნავს, რომ პუტინი ამას ხშირად აკეთებს — ქმნის პირობებს იმისა, რომ პროცესი გაჭიანურდეს და მისი აღსრულება შეუძლებელი გახდეს.

"ჩვენ არ ვაყენებთ პირობებს, რომლებიც რამეს ართულებენ. ამას რუსეთი აკეთებს. როგორც ყოველთვის ვამბობდით, ერთადერთი, ვინც ყველაფერს გაწელავს, ერთადერთი, ვინც არაკონსტრუქციული იქნება, რუსეთია. მათ ომი სჭირდებათ. პუტინმა მშვიდობის წლები მოიპარა და ამ ომს აგრძელებს. ახლა მასზე ზეწოლაა საჭირო. საჭიროა სანქციების შემოღება, რომლებიც დაგვეხმარება. მომავალშიც გავაგრძელებთ მუშაობას ჩვენს ამერიკელ პარტნიორებთან, ევროპელ პარტნიორებთან, მსოფლიოში ყველასთან, ვისაც მშვიდობა სურს, რომ რუსეთს ომის დასრულება ვაიძულოთ", — განაცხადა ზელენსკიმ.