სულ ცოტა დრო დარჩა, სანამ ნარნიისკენ მიმავალ კარადის კარს ისევ შევაღებთ. კლასიკად ქცეული ფენტეზი საგის ახალ ეკრანიზაციას ნეტფლიქსზე მომავალი წლის ბოლოსთვის უნდა ველოდოთ, მაგრამ პროექტის შესახებ ამ დროისთვის მაინცდამაინც ბევრი რამ არაა ცნობილი.

არც ის არ ვიცით, ვინ ითამაშებს ფილმში, რომელსაც ოსკარის ნომინანტი გრეტა გერვიგი იღებს. თუმცა, ვებგამოცემა Deadline-ის ცნობით, ერთ-ერთ მთავარ როლზე, არც მეტი, არც ნაკლები, ბრიტანელი პოპვარსკვლავი Charli XCX განიხილება. სტატიაში დაზუსტებით არაა ნათქვამი, რომელ როლზეა საუბარი, მაგრამ ვარაუდობენ, რომ მომღერალი ჯადისს, თეთრ კუდიანს განასახიერებს. ნაწარმოების წინა კინოადაპტაციაში აღნიშნული როლი ტილდა სუინტონმა შეასრულა.

ფოტო: Disney

აღსანიშნავია, რომ გრეტა გერვიგს და Charli XCX-ს აქამდეც უთანამშრომლიათ. მუსიკოსის სიმღერა Speed Drive გერვიგის წინა ნამუშევრის, ბარბის, საუნდტრეკში შედის. უცნობია, პოპვარსკვლავი ნარნიისთვისაც თუ დაწერს მუსიკას.

ჯერ კიდევ 2018 წელს გახდა ცნობილი, რომ ნეტფლიქსი კლაივ ს. ლუისის შვიდწიგნეულის მიხედვით სერიალსა და ფილმს გადაიღებდა. მოგვიანებით, 2023 წელს, ისიც გაირკვა, რომ ნარნიის ქრონიკების ორ ფილმზე გრეტა გერვიგი იმუშავებდა. ამ დროისთვის კი მხოლოდ ის ვიცით, რომ პირველი ფილმი კინოთეატრებში 2026 წლის ნოემბერში გამოვა, დეკემბრისთვის კი ის უკვე ნეტფლიქსის პლატფორმაზეც იქნება ხელმისაწვდომი.

წლების წინ, ნარნიის ქრონიკების მიხედვით დისნეიმაც გადაიღო სამი ფილმი: ლომი, კუდიანი და გარდერობი (2005), პრინცი კასპიანი (2008) და განთიადის დამმორჩილებლის მოგზაურობა (2010). სამივე ფილმმა ჯამში $1,5 მილიარდზე მეტი გამოიმუშავა.

თუ ფილმები შენი ცხოვრების განუყოფელი ნაწილია და მათი განხილვაც გიყვარს, შემოგვიერთდი ჯგუფში ერთი ფილმიც და...