საქართველოს ბანკისა და კომაროვის STEM სკოლის გაზაფხულის სეზონზე რეგისტრაცია დასრულდა. სკოლაში სწავლის სურვილი წელს 1300-ზე მეტმა მოსწავლემ გამოთქვა.

ახლა მოზარდები მისაღები გამოცდებისთვის ემზადებიან:

  • მე-7, მე-8 და მე-9 კლასელი მოსწავლეებისთვის გამოცდა 12 მარტს ჩატარდება;
  • მე-10 და მე-11 კლასელი მოსწავლეებისთვის კი — 11 მარტს.

ამასთან, ყველა საფეხურის მოსწავლეებისთვის პრეტესტი 10 მარტს ჩატარდება.

მისაღები გამოცდის ტესტის ნიმუში შეგიძლიათ იხილოთ ბმულზე.

STEM სკოლის, როგორც პრეტესტი, ისე მისაღები გამოცდები გაიმართება ონლაინ, რაც შესაძლებლობას მისცემს მოსწავლეებს ტესტი საქართველოს ნებისმიერი რეგიონიდან დაწერონ. მონაწილეებს გამოცდაზე დასასწრები ბმული და ტესტირების დრო რეგისტრაციისას მითითებულ ელ. ფოსტის მისამართზე არაუგვიანეს 7 მარტისა გაეგზავნებათ.

გამოცდების შედეგებიდან გამომდინარე, სკოლაში სწავლას საუკეთესო შედეგის მქონე 300-მდე მოსწავლე შეძლებს. ამასთან, პრეტესტის შედეგები STEM სკოლაში მიღებაზე გავლენას არ მოახდენს.

მოზარდებისთვის ხარისხიან განათლებაზე ხელმისაწვდომობის გაზრდის მიზნით, საქართველოს ბანკი საუკეთესო შედეგების მიმღებ მოსწავლეებს, ყოველწლიურად უფინანსებს სწავლას STEM სკოლაში. გაზაფხულის სეზონზე საუკეთესო შედეგის მქონე 30 მოსწავლე საქართველოს ბანკის 100%-იან გრანტს, ხოლო შედეგების რეიტინგში შემდეგი 15 მოსწავლე 50%-იან დაფინანსებას მიიღებს.

ინფორმაციისთვის: ახალგაზრდების მხარდაჭერის მიზნით, საქართველოს ბანკის CSR მიმართულებისთვის უკვე 5 წელზე მეტია განათლება პრიორიტეტული სფეროა. სწორედ ამიტომ, ბანკი 40-ზე მეტ საგანმანათლებლო პროექტს ახორციელებს და უჭერს მხარს, რითიც 500 000-ზე მეტი მოსწავლისთვის, სტუდენტისა და ახალგაზრდა პროფესიონალისთვის ქმნის განათლების მიღების შესაძლებლობას. ბანკის CSR მიმართულების პორტფელი მოიცავს ისეთ საგანმანათლებლო პროექტებს, როგორებიც არის: საქართველოს ბანკის სტიპენდიები; გიორგი ჩახავას სახელობის სტიპენდია; დიდ ბრიტანეთში, აშშ-სა და გერმანიაში სწავლის დაფინანსება; იდეათეკები - საქართველოს ბანკის ბიბლიოთეკების პროექტი; საქართველოს ბანკის ოლიმპიადები მოსწავლეებისთვის: STEM ოლიმპიადა, ეკონომიკის ოლიმპიადა, Kings-ის ფინანსური განათლების ოლიმპიადა, ევერესტი. ამასთან, საჯარო მეტყველების კონკურსი, და სხვა. საქართველოს ბანკის მიერ განხორციელებული საგანმანათლებლო პროექტების შესახებ დეტალური ინფორმაციის მისაღებად ეწვიეთ ვებგვერდს ganatleba.bog.ge