ხალხის ძალის ლიდერი, გურამ მაჭარაშვილი ამბობს, რომ გერმანიის საგარეო საქმეთა მინისტრის, ანალენა ბერბოკი გერმანიას არ ემსახურება, ის გლობალური ომის პარტიას ემსახურება.

"გერმანიის საგარეო საქმეთა მინისტრს აქვს რამდენიმე ასეული შემთხვევა, როდესაც გერმანიაში ასობით მოქალაქეს უჩივლა და ბევრი მათგანი დააჯარიმეს იმის გამო, რომ სოციალურ ქსელში ბერბოკს ვიღაცამ "სულელი მინისტრი" უწოდა. ამის გამო უჩივლა მოქალაქეს და ახლა ჩვენ ჭკუას გვასწავლის, რომ თურმე სოციალურ ქსელში მას შეურაცხყოფას რომ მიაყენებენ, ეს დასჯადი უნდა იყოს და პოლიციას რომ სილას გაარტყამს, ისეთი პატიმარი ციხიდან უნდა გამოუშვა. უკაცრავად, ქალბატონო ბერბოკ, გაშიფრული ხართ. ეს ორმაგი სტანდარტები არ გამოგივათ, ქართველი საზოგადოება ხედავს, რომ, სამწუხაროდ, "დიფ სთეითი" გერმანიაშიც ბობოქრობს. დარწმუნებული ვარ, როგორც ამერიკელმა ხალხმა, ასევე გერმანელი ხალხიც დაამარცხებს "დიფ სთეითს" გერმანიაში.

…ქალბატონო ბერბოკ, თქვენ მიიღეთ აყვავებული გერმანია და იმდენი გააკეთეთ, თქვენი პოლიტიკით, რომ დღეს თქვენი ქვეყანა ერთ-ერთ მაჩანჩალად აქციეთ ევროპაში - ეს სტატისტიკის მონაცემებია, შეურაცხყოფა არ არის მეგობრებო, ხოლო ჩვენ მივიღეთ 2012 წელს გაჩანაგებული, დამონებული საქართველო და სწორედ ჩვენი სწორი პოლიტიკით მივიღეთ დღევანდელი ორფეხზე მდგომი ქვეყანა.

თქვენ არ ემსახურებით გერმანიას, ემსახურებით გლობალური ომის პარტიას და ეს გამოჩნდა. ჩვენც ვემსახურებით საქართველოს და არა გლობალური ომის პარტიას, ეს არის განსხვავება აგენტებსაც და სუვერენიტეტის დამცველ პოლიტიკოსებს შორის", — თქვა მაჭარაშვილმა პლენარულ სხდომაზე.

ცნობისათვის, გერმანიის საგარეო უწყებამ X-ზე დაწერა, რომ ქართველი ჟურნალისტი, მზია ამაღლობელი ერთ თვეზე მეტია პატიმრობაში ყოფნის შემდეგ სასამართლოში წარდგება და მისი დაუყოვნებლივ გათავისუფლება უნდა მოხდეს.

"ქართული ოცნება ჟურნალისტების, დემონსტრანტებისა და ოპოზიციის წინააღმდეგ დაშინების კამპანიას აგრძელებს. ჩვენ მხარს ვუჭერთ მათ, ვინც თავისუფლებას იცავს", — ვკითხულობთ სამინისტროს პოსტში.

შეგახსენებთ, დღეს, 4 მარტს, "მზია ამაღლობელის საქმეზე" წინასასამართლო სხდომა ბათუმის საქალაქო სასამართლოში 14:00 საათზე გაიმართება. მოსამართლე ვიქტორ მეტრეველმა უნდა გადაწყვიტოს, დარჩება თუ არა პატიმრობაში "ნეტგაზეთისა" და "ბათუმელების" დამფუძნებელი მზია ამაღლობელი