უკრაინელი პოლიტიკოსი და პარტია ბატკივშინას ლიდერი იულია ტიმოშენკო 10 სექტემბერს მიხეილ სააკაშვილს მხარს დაუჭერს და პოლონეთში გაემგზავრება. ამის შესახებ მან ტელეკომპანია NewsOne-ის ეთერში ისაუბრა:

"მე აუცილებლად მხარს დავუჭერ მიხეილ სააკაშვილს. 10 სექტემბერს ის უბრალოდ მშვიდობიანად მივა და წერილს წარადგენს, სადაც წერია იმის არგუმენტები, რომ მას აქვს უკრაინაში ცხოვრების უფლება, მიუხედავად იმისა, რომ მას მოქალაქეობა ჩამოართვეს. მას აქვს უფლება სასამართლოში მივიდეს და გაარკვიოს - სამართლიანად ჩამოართვეს თუ არა მოქალაქეობა. მინდა გვერდით დავუდგე."

16 აგვისტოს საქართველოს ექს-პრესიდენტმა მიხეილ სააკაშვილმა ფეისბუკით მიმართვა გაავრცელა და განაცხადა, რომ 10 სექტემბერს უკრაინაში დაბრუნებას აპირებს. ამჟამად ის ვარშავაში იმყოფება.

26 ივლისს ამერიკაში ვიზიტისას პოროშენკომ სააკაშვილს ორი წლის წინ მიცემული მოქალაქეობა ჩამოართვა, რაც ნიშნავს იმას, რომ ანულირებულია მისი პასპორტიც. მიუხედავად ამისა, შემდეგ სააკაშვილი პოლონეთსა და ლიტვაში ჩავიდა.

5 სექტემბერს, რამდენიმე დღის წინ კი უკრაინის იუსტიციის მინისტრის განცხადებით, საქართველომ უკრაინას სააკაშვილის ექსტრადაციით მიმართა. საქართველოს იუსტიციის მინისტრის თეა წულუკიანის თქმით, ამ საკითხზე უკრაინამ თვითონ მიმართა ქართულ მხარეს.