უკრაინის პრემიერმინისტრი დენის შმიგალი აშშ-სა და უკრაინას შორის მიღწეული "იშვიათი მინერალების" შეთანხმების საკვანძო პუნქტებს აქვეყნებს. ტელეგრამის პირად არხზე გამოქვეყნებული ინფორმაციიდან ვიგებთ, რომ შეიქმნება უკრაინის აღდგენის საინვესტიციო ფონდი, რომელსაც ორივე ქვეყნის მთავრობები განაგებენ.

  • უკრაინა და აშშ აღდგენის საინვესტიციო ფონდს შექმნიან, რომელიც საერთო საკუთრება იქნება და ერთობლივად იქნება მართული ორივე ქვეყნის მთავრობების მიერ;
  • უკრაინული წიაღისეული და რესურსები უკრაინულებად რჩება, ის არ გადაეცემა მმართველობაში აშშ-ს, არც ვინმე სხვას;
  • უკრაინა საკუთარი ბუნებრივი რესურსების აქტივებიდან სამომავლო შემოსავლების 50%-ს შეიტანს ფონდში;
  • აშშ შენატანებს გააკეთებს ფონდში სახსრების, ფინანსური ინსტრუმენტებისა და სხვა აქტივების სახით, რომლებიც კრიტიკულად მნიშვნელოვანია უკრაინის აღდგენისთვის;
  • ფონდის მიერ შეგროვებული სახსრები მხოლოდ უკრაინის აღდგენის პროექტებში იქნება ინვესტირებული. ფაქტობრივად, ვსაუბრობთ ფონდზე უკრაინელების მომავალი თაობებისთვის;
  • შეთანხმებაში გათვალისწინებულია ევროინტეგრაციის პროცესის ფარგლებში უკრაინის ვალდებულებები.