დღეს, 25 თებერვალს თბილისის სხვადასხვა ლოკაციაზე მოქალაქეები შეიკრიბნენ და გმირთა მოედნის გავლით, რუსთაველის გამზირისკენ მარშით დაიძრნენ.

1921 წლის 25 თებერვალი საქართველოს გასაბჭოების თარიღია.

დღევანდელი მარშებიც სწორედ იმ ადამიანებისა თუ ადამიანთა ჯგუფების სახელობის იყო, ვინც იმ დროინდელ საქართველოში საბჭოთა რუსეთის წინააღმდეგ იბრძოდა.

2025 წლის 25 თებერვალს საქართველოს მე-5 პრეზიდენტი საღამოს 21:00 საათზე, რუსთაველის გამზირზე მივიდა და შეკრებილ მოქალაქეებს სიტყვით მიმართა.

ცნობისთვის, რუსთაველის გამზირი დღეს 90-ედ გადაიკეტა.

"არ ვივიწყებთ იმ 25 თებერვალს, იმ ძალიან ცივ დღეს. დღესაც არის ძალიან ცივი დღე. არ გვავიწყდება, რომ სწორედ აქ, რუსთაველზე მოაბიჯებდა რუსეთის ჯარი"
დღეს ალბათ ყველა სკოლაში უნდა აასწავლიდნენ, დღეს რა დღეა, რა მოხდა მაშინ, ვინ შემოაბიჯა ჩვენს დედაქალაქში, ვინ იყო ის ვითომცდა მშვიდობის მტრედი, რომელთანაც დამოუკიდებელი საქართველოს მთავრობამ 1920 წლის 7 მაისს ხელი მოაწერა ხელშეკრულებას, რომ ის მას მშვიდობას და სუვერენიტეტის აღიარებას მოუტანდა, და 9 თვის შემდეგ, ჯერ მელანიც არ იყო შემშრალი, რომ შემოაბიჯა რუსულმა ჯარმა.
ეს არის რუსეთი. დღეს პროპაგანდა რომ გვეუბნება, რომ რუსეთს მშვიდობა უნდა და ვიღაცას, ომის პარტიას უნდა ომი - ეს უნდა გავიხსენოთ და ამიტომ უნდა ასწავლიდნენ ამას სკოლებში. მაშინაც ამას ამბობდა რუსეთის პროპაგანდა, რომ ევროპელები იყვნენ იმპერიალისტები და უნდოდათ ომი, ხოლო რუსეთს უნდოდა მშვიდობა," — თქვა სალომე ზურაბიშვილმა

პრეზიდენტმა ასევე ისაუბრა ქვეყანაში შექმნილი პოლიტიკური კრიზისის შესახებ და ხაზგასმით აღნიშნა, რომ ამ კრიზისს მხოლოდ ხელახალი არჩევნები განმუხტავს.

ზურაბიშვილმა ყურადღება გაამახვილა, საარჩევნო სისტემის რადიკალური რეფორმირების საჭიროებაზე და პროევროპულ აქციებზე დაკავებული თანამოქალაქეების დაუყოვნებლივ გათავისუფლება კიდევ ერთხელ მოითხოვა.

მე-5 პრეზიდენტმა შეკრებილი საზოგადოება გაამხნევა და მათ მადლობა გადაუხადა ღირებულებების ერთგულებისა და სამშობლოს სიყვარულისთვის!

"ომის, ოკუპაციის, გატაცებების, სხვადასხვა ეკონომიკური ზეწოლის მიუხედავად, ჩვენ არ მივეცით საშუალება რუსეთს, არ დავუთმეთ არც ჩვენი ევროპული გზა, არც ჩვენი დამოუკიდებლობა და არც ჩვენი თავისუფლება და აბა აქ, შიდა რუსულ რეჟიმს რა, დავუთმობთ?" — განაცხადა სალომე ზურაბიშვილმა