რუსეთის უკრაინაში შეჭრიდან 3 წლის თავზე, დიდი ბრიტანეთი აგრესორს საქნციების 2022 წლის შემდეგ უდიდეს პაკეტს უწესებს.

სანქციათა პაკეტის სამიზნეები არიან რუსული სამხედრო მომარაგების ჯაჭვი, ე.წ "ჩრდილოვანი ფლოტი", რომელიც რუსული ნავთობით ვაჭრობაშია ჩართული და კონკრეტული პირები, რომლებიც პუტინის რეჟიმს აძლიერებენ.

"როგორც პრემიერმინისტრმა განაცხადა გასულ კვირას, ჩვენ ჩვენი კონტინენტის კოლექტიური უსაფრთხოების გადამწყვეტი მომენტის წინაშე ვდგავართ. გაერთიანებული სამეფო მუშაობს მოკავშირეებთან ერთად უკრაინა საუკეთესო პოზიციაში მოსაქცევად, რათა მშვიდობა მყარად და ძლიერად მოიპოვოს. დღევანდელი ქმედება ამ მიზნისკენ გადადგმული მორიგი ნაბიჯია", — ვკითხულობთ პრიტანეთის პარლამენტის პრესრელიზში.

ბრიტანული სანქციები შეეხებათ ცენტრალური აზიის ქვეყნებში, თურქეთში, ტაილანდში, ინდოეთსა და ჩინეთში არსებულ კომპანიებს, რომლებიც მონაწილეობას იღებენ იმ ელექტრომოწყობილობების დამზადებაში, რომელთაც რუსეთი შეიარაღებაში იყენებს.

პრესრელიზის მიხედვით, დასანქცირდნენ ჩრდილოეთ კორეის თავდაცვის მინისტრი ნო კვანგ-ჩოლი და სხვა გენერლებიც, რომლებიც პასუხისმგებლები არიან 11 ათასი ჩრდილოეთკორეელი ჯარისკაცის ომში გაგზავნაზე, რომელთაც რუსეთი "საზარბაზნე ხორცად" იყენებს.

დასანქცირდება დამატებით 13 რუსული სამიზნე, მათ შორის Grant-Trade-ის მფლობელი მარატ მუსტაფაევი და მისი და დინარა მუსტაფაევა, რომლებმაც კომპანია რუსეთში განვითარებული ტექნოლოგიური საშუალებების ევროპიდან შესატანად გამოიყენეს.

ომის წლების განმავლობაში პირველად, დასანქცირდნენ უცხოური საფინანსო ინსტიტუტებიც, რომლებიც რუსეთს ეხმარებოდნენ — ასეთია ყირგიზეთში ბაზირებული ბანკი OJSC Keremet Bank.

"დღევანდელი ქმედება, უდიდესი ბოლო 3 წელიწადში, ხაზს უსვამს უკრაინის მიმართ გაერთიანებული სამეფოს თანადგომას. თითოეული შეფერხებული სამხედრო ხაზი, თითოეული დაბლოკილი რუბლი და პუტინის აგრესიის თითოეული გამოვლენილი მხარდამჭერი წინ გადადგმული ნაბიჯია ხანგრძლივი მშვიდობისკენ. ხანგრძლივი მშვიდობის მიღწევა მხოლოდ ძალითაა შესაძლებელი — სწორედ ამიტომ ვართ ფოკუსირებული, უკრაინა შესაძლო უძლიერეს პოზიციაში მოვაქციოთ", — განაცხადა ბრიტანეთის საგარეო საქმეთა მინისტრმა დევიდ ლემმა.