უკრაინაში რუსეთის სრულმასშტაბიანი შეჭრის სამი წლის თავზე, ქალაქის მერმა, კახა კალაძემ განაცხადა, რომ კარგი იქნებოდა, რომ "უკრაინაში ომის თავიდან არიდება მომხდარიყო, რაც, რა თქმა უნდა, შესაძლებელი იყო".

"მშვიდობას არ აქვს ალტერნატივა. ძალიან კარგი იქნებოდა, რომ მომხდარიყო ომის თავიდან არიდება, რაც, რა თქმა უნდა, შესაძლებელი იყო. ჩვენ იმიტომ ვართ პოლიტიკაში და იმიტომ გვირჩევს ხალხი, რომ საფრთხეები ავარიდოთ ქვეყანას. სამწუხაროა და ძალიან მძიმეა ის, რაც უკრაინაში მოხდა, მაგრამ, ცხადია, ეს ყველაფერი უნდა დამთავრდეს. აშშ-ის პრეზიდენტი ყველაფერს აკეთებს იმისთვის, რომ მოხდეს შეთანხმება და, რა თქმა უნდა, ჩვენ მხარი დავუჭირეთ აღნიშნულ რეზოლუციას," — განაცხადა კახა კალაძემ.

უკრაინაში ომის სამი წლისთავზე, აშშ მოუწოდებს კიევს, გაეროში წარდგენილი რეზოლუციის პროექტი უკან გაიწვიოს და მხარი დაუჭიროს შტატების ვერსიას, სადაც არც ისაა ნახსენები ვინ დაიწყო ომი, არც კონკრეტული მოთხოვნებია კრემლის მიმართ. დოკუმენტი ორიენტირებულია ომის დამთავრებაზე. აღნიშნულ რეზოლუციას მხოლოდ ერთი თანასპონსორი საქართველო ჰყავდა. რეზოლუციის პროექტს შეუერთდა ისრაელი, უნგრეთი და ჩრდილოეთ მაკედონია.

რაც შეეხება კიევის რეზოლუციას, ამ დოკუმენტით უკრაინა რუსეთს უკრაინაში შეჭრაში ადანაშაულებს და მას ევროპის ქვეყნები უჭერენ მხარს.