"მინდა, მივმართო მზია ამაღლობელს. მას ვუთხრა დიდი მადლობა იმისთვის, რომ შიმშილობა შეწყვიტა. იმიტომ, რომ ჩვენ გვჭირდება ლიდერები, გვჭირდება მაგარი ქალები, მაგარი პიროვნებები ცოცხალი, არ გვჭირდება მსხვერპლი," — განაცხადა საქართველოს მე-5 პრეზიდენტმა, სალომე ზურაბიშვილმა ბრიფინგზე.

18 თებერვალს სალომე ზურაბიშვილმა ბრიფინგი გამართა, რომელშიც აეროპორტში მასზე თავდასხმაზე ისაუბრა. ზურაბიშვილმა, აეროპორტში თავდასხმის გარდა, კომენტარი ბათუმელებისა და ნეტგაზეთის დამფუძნებლის, მზია ამაღლობელის შიმშილობის შეწყვეტის გადაწყვეტილებაზეც გააკეთა.

ზურაბიშვილმა ჟურნალისტს მადლობა გადაუხადა შიმშილობის შეწყვეტისთვის და სწრაფად გამოჯანმრთელება უსურვა.

ასევე იხილეთ: "ამ დღეებში ექიმები დახმარებით შევეცდები, როგორმე შევძლო კვების აღდგენა" — მზია ამაღლობელი შიმშილობას წყვეტს

"მინდა, მივმართო მზია ამაღლობელს. მას ვუთხრა დიდი მადლობა იმისთვის, რაც მან გააკეთა, იმისთვის, რაც მან დღეს გააკეთა, როცა შიმშილობა შეწყვიტა. იმიტომ, რომ ჩვენ გვჭირდება ლიდერები, გვჭირდება მაგარი ქალები, მაგარი პიროვნებები ცოცხალი, არ გვჭირდება მსხვერპლი.

ჩვენ გვჭირდება გამარჯვების სული და ეს მოგვცა მზია ამაღლობელმა. ეს შემართება საზღვრებს მიღმა გაიტანა, ძალიან ბევრი ადამიანი მას გულშემატკივრობს და ეს გაგრძელდება და კიდევ უფრო გაძლიერდება, როცა ის იქნება ცოცხლად ჩვენი საზოგადოების ლიდერი, ეს ძალიან გვჭირდება. ძალიან დიდი მადლობა მზია, გისურვებთ სწრაფად გამოჯანმრთელებას", — განაცხადა სალომე ზურაბიშვილმა.

შეგახსნებთ, ბათუმელების და ნეტგაზეთის დამფუძნებელმა და დირექტორმა, მზია ამაღლობელმა შიმშილობის 38-ე დღეს შიმშილობა შეწყვიტა. "ვივამედიდან" მზია ამაღლობელის გამოგზავნილი წერილი ბრიფინგზე ბათუმელების რედაქტორმა ეთერ თურაძემ წაიკითხა.

ასევე იხილეთ: "ეს რეაქცია არის "პატარა კაცების" პატარა ბოღმა" — სალომე ზურაბიშვილი