საქართველოში გერმანიის ელჩი, პეტერ ფიშერი 18 თებერვალს თბილისის საერთაშორისო აეროპორტში საქართველოს მე-5 პრეზიდენტ სალომე ზურაბიშვილზე თავდასხმის ფაქტს X-ზე გამოეხმაურა. ელჩი სოლიდარობას უცხადებს სალომე ზურაბიშვილს და სვამს კითხვას, მოჰყვება თუ არა სასჯელი ამგვარ ქმედებას.

"სოლიდარობა სალომე ზურაბიშვილს, რომელსაც თბილისის საერთაშორისო აეროპორტში თავს დაესხნენ. ორ დღეში მეორე თავდასხმა მგზავრებზე ჩამოფრენის დარბაზში — ეს ადგილი უსაფრთხოა? იქნება შედეგები?", — წერს ფიშერი.

ინფორმაციისთვის, მიუნხენის უსაფრთხოების კონფერენციიდან დაბრუნებულ საქართველოს მე-5 პრეზიდენტს, სალომე ზურაბიშვილის და პარტია გახარია საქართველოსთვის ლიდერს, გიორგი გახარიას, თბილისის აეროპორტში უცნობი პირები დახვდნენ, რომლებმაც მათ კვერცხები დაუშინეს.