"ვივამედის" კლინიკასთან მყოფმა ნეტგაზეთის რედაქტორმა, ნესტან ცეცხლაძემ მადლობა გადაუხადა მზია ამაღლობელს შიმშილობის შეწყვეტისთვის. მისი თქმით, ახლა უფრო ძლიერები არიან იმისთვის, რომ იბრძოლონ როგორც მზიას, ისე ყველა პოლიტპატიმრის გათავისუფლებისთვის

"იმ ფონზე, როცა ბათუმში დაიღუპა 2 ბავშვი. მთელი ამ პერიოდის განმავლობაში ის [მზია ამაღლობელი] წუხდა და მოგვიწოდებდა, რომ არ ყოფილიყო ის ყურადღების მედიის ცენტრში. ამიტომ, როგორც ის ამ წერილში წერს, მიიღო გადაწყვეტილება, რომ ამ კვირის განმავლობაში ექიმების დახმარებით დაიწყოს კვება. ის მოუწოდებს მოშიმშილე პატიმრებს — ქათამაძეს ადა ნიკოლოზ ჯავახიშვილს, რომ მათაც შეწყვიტონ შიმშილობა.

მე მადლობა მინდა ვუთხრა მას მისი ამ გადაწყვეტილებისთვის. ამ გამბედაობისთვის, იმისთვის, რასაც აკეთებდა და რასაც აკეთებს. გვაძლიერებს მისი ეს გადაწყვეტილება იმისთვის, რომ ვიბრძოლოთ მისი და ჩვენი, ყველას თავისუფლებისთვის", — განაცხადა ნესტან ცეცხლაძემ.

ბათუმელების და ნეტგაზეთის დამფუძნებელმა და დირექტორმა, მზია ამაღლობელმა შიმშილობის 38-ე დღეს შიმშილობა შეწყვიტა. "ვივამედიდან" მზია ამაღლობელის გამოგზავნილი წერილი ბრიფინგზე "ბათუმელების" რედაქტორმა ეთერ თურაძემ წაიკითხა.

მზია ამაღლობელი წერს, რომ ექიმების დახმარებით შეეცდება კვების აღდგენას.

"ბათუმში ოცნების ქალაქში მომხდარი ტრაგედიის, ორი არასრულწლოვანი ბავშვის თხრილში ჩავარდნის და დაღუპვის ფონზე ჩემს ჯანმრთელობასა და სიცოცხლეზე წუხილის მოსმენა წარმოუდგენლად მძიმეა ჩემთვის. ამ დღეებში ექიმები დახმარებით შევეცდები, როგორმე შევძლო კვების აღდგენა. სინდისის პატიმრებს - თემურ ქათამაძეს, ნიკოლოზ ჯავახიშვილს მადლობა სოლიდარობისთვის. ვთხოვთ, მათაც შეწყვიტონ შიმშილობა. განსაკუთრებულ პასუხისმგებლობას ვგრძნობ ჩემი თანამოაზრეების, კოლეგების, მეგობრებისა და ოჯახის მიმართ. არ მინდა ჩემმა შიმშილობამ დაგასუსტოთ. თქვენ ჩემს ნაცვლადაც უნდა იბრძოლოთ" — წერს მზია ამაღლობელი კლინიკიდან გამოგზავნილ წერილში.