"გიგა არ აპირებს (საგამოძიებო კომისიის გამოკითხვაზე) მისვლას და ჩასვან ერთი წლით ციხეში, პროტესტს რა დააკლდება ამით, გიგა ბოკერიას პროტესტია?", — ამის შესახებ ფედერალისტების ერთ-ერთმა ლიდერმა, თამარ ჩერგოლეიშვილმა "პალიტრანიუსის" ეთერში განაცხადა.

მისი თქმით, ენმ-ის ხელისუფლების საქმიანობის შემსწავლელი დროებითი საგამოძიებო კომისია ივანიშვილის ცირკია, რომელიც იმისთვისაა განკუთვნილი, რომ საზოგადოებას კრიზისიდან ყურადღება სხვა რამეზე გადაატანინონ.

"მე არ მგონია, რომ ბიძინა ივანიშვილს აქვს რესურსი, ეს ყველაფერი რეპრესიებით ჩაახშოს, მითუმეტეს, რომ არ ჰყავს პროტესტს ერთი თავი. რა ვიცი, დაიბაროს ზურაბ ჭიაბერაშვილი ან დაიბაროს გიგა ბოკერია. გიგა არ აპირებს (საგამოძიებო კომისიის გამოკითხვაზე) მისვლას და ჩასვეს ერთი წლით ციხეში, პროტესტს რა დააკლდება ამით, გიგა ბოკერიას პროტესტია? ან ნათია მოგელაძის გამო დგანან? ეს ადამიანები იმიტომ დგანან ქუჩაში, რომ მათ უნდათ რეჟიმის ცვლილება. რეჟიმის ცვლილება არ ენდომებოდათ, რეჟიმს რომ არ გადაეხვია კურსისთვის, სანქციები არ იარსებებდა საერთოდ, ბიძინა ივანიშვილს რომ საკუთარი ამომრჩეველი არ "გადაეგდო". ეს ძალა და ენერგია პროტესტს იმიტომ აქვს და ამდენი ხანი იმიტომ ძლებს, რომ ივანიშვილმა საკუთარი ამომრჩევლებიც "გადააგდო".

ეს არის ივანიშვილის ცირკი, განკუთვნილია იმისთვის, რომ მათ მიერ შექმნილი კრიზისიდან გადაიტანონ ყურადღება, თითქოს ნაციონალური მოძრაობის შესახებ არის ეს პროცესი, მივიდნენ ისევ იმ გამარჯვების კარტამდე, რაც არის პოლარიზაცია, თითქოს ნაციონალური მოძრაობასა და ქართულ ოცნებას შორის არის დაპირისპირება და მაგ ხაფანგში შეჰყვეს ვინმე? დაიჭირონ მაშინ, ერთ წლით შეუძლიათ დაჭერა, თუ მანდამდე მივლენ. ამით იმუქრებიან და ლაზარემ თუ გაძლო ციხეში, ჩემი ქმარიც გაძლებს ერთი წელი, ამით პროტესტს არაფერი დააკლდება, ეს მათ ხელში იარაღი აღარ არის, მაშინ უნდა მოჰფრთხილებოდნენ სასჯელს — როცა 50 ადამიანზე მეტი პოლიტიკურ პატიმრობაშია და სრულიად უდანაშაულო ხალხი ციხეშია, საგამოძიებო კომისიაზე უნდა მივიდე, თორემ დამიჭერენო — ამას ვინ გამოიყენებს", — თქვა ჩერგოლეიშვილმა.

ენმ-ის ხელისუფლების საქმიანობის შემსწავლელმა დროებითმა საგამოძიებო კომისიამ მუშაობა 13 თებერვალს დაიწყო. კომისიას თეა წულუკიანი ხელმძღვანელობს, სოზარ სუბარი საგამოძიებო კომისიის მდივანია.