ნაციონალური მოძრაობის ხელისუფლების საქმიანობის შემსწავლელ კომისიას თეა წულუკიანი უხელმძღვანელებს, სოზარ სუბარი საგამოძიებო კომისიის მდივანი იქნება.

2003-2012 წლებში მოქმედი რეჟიმის და რეჟიმის პოლიტიკური თანამდებობის პირების საქმიანობის შესწავლის მიზნით შექმნილ დროებით საგამოძიებო კომისიაში არიან:

ფრაქცია ქართულმა ოცნებიდან კომისიაში არიან — თეა წულუკიანი, ალექსანდრე ტაბატაძე, თენგიზ შარმანაშვილი, ალუდა ღუდუშაური და პაატა სალია.

საპარლამენტო ოპოზიციის სტატუსით, კომისიაში იქნებიან ხალხის ძალის წევრები სოზარ სუბარი და გურამ მაჭარაშვილი, ხოლო ევროპელი სოციალისტებიდან — ილია ინჯია.

საგამოძიებო კომისიის შემადგენლობა სულ ათი წევრისთვისაა განსაზღვრული, ორი ადგილი ვაკანტურია, რადგან ის პარტია გახარია საქართველოსთვის წევრებისათვისაა განკუთვნილი.

პარლამენტში დროებითი საგამოძიებო კომისიის პირველი სხდომა ამ წუთებში მიმდინარეობს.

დადგენილებით, ოცნების პარლამენტის დროებითი საგამოძიებო კომისიის უფლებამოსილების ვადა განსაზღვრულია სამი თვით. თუ საგამოძიებო კომისია რეგლამენტით გათვალისწინებულ 3 თვეში ვერ მოასწრებს თავის საქმიანობას, ამავე რეგლამენტის გათვალისწინებით, მისი ვადა გაგრძელდება, მაგრამ არაუმეტეს 6 თვისა.

დადგენილების პროექტი პლენარულ სხდომაზე ოცნების პარლამენტის წევრმა, ირაკლი კირცხალიამ წარადგინა.

"ეს იყო ჩვენი ერთ-ერთი მთავარი წინასაარჩევნო დაპირება და მინიმუმ ამ ყველაფერს ელოდება მოსახლეობის ის უდიდესი ნაწილი, რომელმაც კიდევ ერთხელ გვანდო ამ ქვეყნის სადავეები იმ პასუხისმგებლობიან გუნდს, რომელსაც ქართული ოცნება ჰქვია. დარწმუნებული ვარ, თითოეული ჩვენგანი ვაცნობიერებთ, თუ რა მნიშვნელობა ექნება აღნიშნული კომისიის მუშაობას და მის შედეგებს ჩვენი ქვეყნის ჯანსაღი განვითარებისთვის", — განაცხადა ირაკლი კირცხალიამ.