აშშ უკრაინის NATO-ში გაწევრიანებას ან 2014 წლამდე არსებულ საზღვრებში დაბრუნებას არ გამორიცხავს, — ამის შესახებ აშშ-ის პრეზიდენტის რუსეთსა და უკრაინაში სპეციალური წარმომადგენლის კიტ კელოგის მოადგილემ, ჯონ კოულმა, Reuters-თან განაცხადა.

"ამჟამად ეს ჯერ კიდევ მაგიდაზეა", — თქვა მან კითხვაზე, გამორიცხა თუ არა შეერთებულმა შტატებმა უკრაინის ნატოში გაწევრიანებას.

კოულმა აღნიშნა, რომ უკრაინის 2014 წლის საზღვრებში შესაძლო დაბრუნება ასევე რჩება დღის წესრიგში.

ოფიციალური მოლაპარაკებები ჯერ არ დაწყებულა, თქვა მან, და შეერთებული შტატები ჯერ კიდევ აწარმოებს დისკუსიებს ევროპულ ლიდერებთან და კიევთან იმაზე, თუ როგორ უნდა დასრულდეს ომი საუკეთესო შედეგით.

"რა ადგილი უკავია ამ ყველაფერში უკრაინელებს და ევროპელებს? ახლა არ ვიცით. აუცილებელია ევროპელების მოზიდვა. ევროპელებს სურთ ამ ომის დასრულება. მათ სურთ მონაწილეობა მიიღონ კიევის სამხედრო მხარდაჭერაში. არის ეჭვები... იმასთან დაკავშირებით არიან თუ არა მზად ისინი ამისთვის 100%-ით. მაგრამ ყველაფერი, რაც მე მესმის, მიუთითებს იმაზე, რომ ისინი ნამდვილად მზად არიან შეუერთდნენ მოლაპარაკებებს", — განაცხადა დიპლომატმა.

მანამდე აშშ-ის პრეზიდენტმა დონალდ ტრამპმა განაცხადა, რომ არ სჯერა უკრაინის იმ საზღვრების აღდგენის ალბათობის, რომელიც 2014 წელს რუსეთთან ომის დაწყებამდე არსებობდა. ამავე დროს, მან აღნიშნა, რომ უკრაინის ზოგიერთი ოკუპირებული ტერიტორია "შეიძლება დაბრუნდეს".

თეთრი სახლის ლიდერმა ასევე განაცხადა, რომ უკრაინის ნატოში გაწევრიანების პერსპექტივა "არაპრაქტიკული და ნაკლებად სავარაუდოა".