13 თებერვალს, რეფორმების პარტიის ლიდერმა, ტრამპის მთავარმა ბრიტანელმა მოკავშირემ, ნაიჯელ ფარაჟმა თქვა, რომ უკრაინაში გრძელვადიანი მშვიდობის მისაღწევად, "ალბათ არსებითია" უკრაინა NATO-ში გაწევრიანდეს. ამის შესახებ Politico წერს.

"თუ შევძლებთ, რომ პუტინი და ზელენსკი ისეთ მდგომარეობაში ჩავაყენოთ, რომ გონივრული მოლაპარაკებები გაიმართოს, ვფიქრობ, სამომავლოდ უკრაინის NATO-ში გაწევრიანება, ალბათ, აუცილებელია", — განაცხადა ფარაჟმა პრესკონფერენციაზე.

აღსანიშნავია, რომ ამ კომენტარამდე ფარაჟი ამტკიცებდა, რომ NATO-მ და ევროკავშირმა ვლადიმერ პუტინის პროვოცირება მოახდინეს უკრაინაში შეჭრაში.

შეგახსენებთ, რომ ტრამპის თავდაცვის მდივანმა პიტ ჰეგსეთმა გამორიცხა უკრაინის NATO-ში გაწევრიანება და თქვა, რომ ევროპამ "უკრაინას მომავალში ლეტალური და არალეტალური იარაღის დახმარების დიდი წილი უნდა გაუწიოს". მან ასევე განაცხადა, რომ არ იქნება შეერთებული შტატების ჯარები ჩართული სამშვიდობო ოპერაციაში.