NBC News-ის ცნობით, აშშ-ის პრეზიდენტი დონალდ ტრამპი დღეს, 6 თებერვალს, ხელს მოაწერს ბრძანებას, რომლის მიხედვითაც სანქციებს დაუწესებს სისხლის სამართლის საერთაშორისო სასამართლოს (ICC) — ტრამპი ბრალს სდებს უწყებას აშშ-ისა და ისრაელის წინააღმდეგ მოქმედებაში.

ბრძანება მოიცავს ფინანსურ სანქციებსა და სავიზო შეზღუდვებს ICC-ის ჯერჯერობით უცნობი თანამდებობის პირებისა და მათი ოჯახის წევრების მიმართ, რომლებიც აშშ-ის მოქალაქეებისა და მოკავშირეების წინააღმდეგ გამოძიებაში მონაწილეობდნენ.

გასულ ნოემბერს ICC-სა და ვაშინგტონს შორის ურთიერთობა დაიძაბა მას შემდეგ, რაც სასამართლომ ისრაელის პრემიერმინისტრ ბენიამინ ნეთანიაჰუს, თავდაცვის ყოფილ მინისტრ იოავ გალანტისა და ჰამასის არაერთი ლიდერის დაპატიმრების ბრძანებები გამოსცა. ტრამპის ადმინისტრაციამ ამას "სამარცხვინო მორალური გათანაბრება" უწოდა.

სასამართლომ განაცხადა, რომ ნეთანიაჰუ და გალანტი მასობრივ შიმშილობას ომის მეთოდად იყენებდნენ, უზღუდავდნენ რა წვდომას ღაზის მოსახლეობას ჰუმანიტარულ დახმარებაზე — განცხადებებს ისრაელმა მცდარი და ანტისემიტური უწოდა.

პრეზიდენტობის წინა ვადაში, დონალდ ტრამპმა ICC-ს შესახებ განაცხადა, რომ ორგანოს "არ აქვს იურისდიქცია, ლეგიტიმურობა და ავტორიტეტი აშშ-ში".