ირანის პრეზიდენტი მასუდ ფეზეშქიანი პასუხობს აშშ-ის პრეზიდენტ დონალდ ტრამპს და აცხადებს, რომ ირანი ბირთვულ იარაღზე არ მუშაობს — 4 თებერვალს ტრამპმა ხელი მოაწერა აღმასრულებელ ბრძანებას, რომლითაც ირანზე "მაქსიმალური წნეხი" აღადგინა და მოგვიანებით განაცხადა, რომ მათ უფლებას არ მისცემს, რომ ბირთვული იარაღი შექმნან.

"ჩვენ არ ვცდილობთ ბირთვული იარაღის შექმნას — ამ საკითხის გადამოწმება ძალიან მარტივი ამოცანაა", — განაცხადა მასუდ ფეზეშქიანმა თეირანში უცხოელ დიპლომატებთან შეხვედრაზე.

შეხვედრაზე, რომელიც ტელევიზიით გადაიცემოდა, ფეზეშქიანმა ისაუბრა დიდი ხნის წინ აიათოლა ალი ხამენეის მიერ გამოცხადებულ ფატვაზე (რელიგიურ ედიქტზე), რომლითაც ატომური იარაღი აიკრძალა.

მისი განცხადებით, მსგავსი იარაღის განვითარებას ირანი არ ცდილობს, რადგან "ირანის ისლამური რესპუბლიკის დოქტრინით უდანაშაულო ადამიანების დახოცვა მისაღები არ არის".

მიუხედავად ამისა, გაეროს განცხადებით, ირანი ამდიდრებს ურანს სამოქალაქო გამოყენებისათვის საჭიროზე მაღალ დონეზე და ირანელი ლიდერები წარსულში არაერთხელ დაემუქრნენ ისრაელს მთლიანი ქალაქების განადგურებით.