დღეს, სოციალურ ქსელში გავრცელდა ინფორმაცია, რომლის თანახმადაც "ბაკურიანი ციდას" საბავშვო ბოთლებში გაიპარა ტუტე, რის გამოც პირის ღრუს დამწვრობითა და ინტოქსიკაციით 100-ზე მეტი ბავშვი საავადმყოფოში გადაიყვანეს.

პოსტის ავტორმა მოგვიანებით ინფორმაცია ჩაასწორა. განახლებული ინფორმაციის თანახმად მხოლოდ ერთი ბავშვია ჰოსპიტალიზებული.

IDS ბორჯომი მათი სასმელი წყლით ბავშვების ინტოქსიკაციის ფაქტს უარყოფს და ოფიციალურ განცხადებას ავრცელებს სადაც წერია, რომ გადამოწმდა ამჟამად ქსელში არსებული ყველა პარტიის ნიმუში, მათ შორის იმ კონკრეტულ მაღაზიაში, სადაც მოხდა პროდუქტის შეძენა. კომპანიის თქმით, ექსპერტიზის შედეგად დარღვევა არ გამოვლენილა. ასევე გადამოწმდა საწარმოო პროცესის სრული ტექნოლოგიური ციკლი, რომელიც პროდუქტში რაიმე უცხო ნივთიერების მოხვედრას გამორიცხავს.

"სოციალურ ქსელში გავრცელდა ინფორმაცია, რომ „ბაკურიანი ციდას“ ბოთლიდან დალეული სითხით მოხდა მცირეწლოვანი ბავშვის ჰოსპიტალიზაცია. გაცნობებთ, რომ კომპანიის მხრიდან მყისიერი რეაგირების შედეგად, გადამოწმდა კონკრეტულ მაღაზიაში (სადაც ჩვენს ხელთ არსებული ინფორმაციით მოხდა პროდუქტის შეძენა) ნიმუშები და დარღვევა არ გამოვლენილა.

პარალელურ რეჟიმში, შევამოწმეთ ამჟამად ქსელში არსებული ყველა პარტიის ნიმუში და ვადასტურებთ, რომ აღნიშნულ ნიმუშებში დარღვევა არ დაფიქსირებულა.

ასევე გადამოწმდა საწარმოო პროცესის სრული ტექნოლოგიური ციკლი, რომელიც გამორიცხავს პროდუქტში რაიმე უცხო ნივთიერების მოხვედრას" — განცხადებას კომპანია IDS ბორჯომი საქართველო ავრცელებს.

სასმელი წყლით ბავშვების ინტოქსიკაციას უარყოფს იაშვილის კლინიკა.

"ინფორმაცია, რომ იაშვილის ბავშვთა ცენტრალურ საავადმყოფოში ინტოქსიკაციით 120 ბავშვი იმყოფება, სინამდვილეს არ შეესაბამება — დღეის მონაცემებით, ჩვენს საავადმყოფოში სავარაუდო ინტოქსიკაციის დიაგნოზით მკურნალობას მხოლოდ ერთი პაციენტი გადის", — ამის შესახებ იაშვილის ბავშვთა ცენტრალური საავადმყოფოს განცხადებაშია აღნიშნული.

მისი თქმით, ინტოქსიკაციის მიზეზები მოკვლევის შედეგად გახდება ცნობილი.

"სოციალურ ქსელში გავრცელებული ინფორმაცია, რომ იაშვილის ბავშვთა ცენტრალურ საავადმყოფოში ინტოქსიკაციით 120 ბავშვი იმყოფება, სინამდვილეს არ შეესაბამება. დღევანდელი დღის მონაცემებით, ჩვენს საავადმყოფოში სავარაუდო ინტოქსიკაციის დიაგნოზით მკურნალობას გადის მხოლოდ ერთი პაციენტი. ინტოქსიკაციის მიზეზები შესაბამისი ორგანოების მოკვლევის შედეგად გახდება ცნობილი. ამ ეტაპზე ბავშვის მდგომარეობა სტაბილურია", — აღნიშნულია განცხადებაში.