აზერბაიჯანის პრეზიდენტის ადმინისტრაცია მილიონერ ფილანტროპს, ჯორჯ სოროსსა და სომხებს ალიევების ოჯახის წინააღდეგ კამპანიაში ადანაშაულებს.

პრეზიდენტის პრესსამსახური, OCCRP-ის, BBC-ისა და The Guardian-ის ვებგვერდებზე გამოქვეყნებულ სტატიებს, აზერბაიჯანის მმართველი ელიტის მიერ ფულის გათეთრების კომლექსურ სქემასთან დაკავშირებით, ემიჯნება და აცხადებს, რომ ბრალდებებთან საერთო არაფერი აქვთ.

"ჯორჯ სოროსის ბინძური ქმედებები სერიოზულად გამოსაძიებელია. სომეხი ლობი, რომელიც მასთან ერთად მოქმედებს, აზერბაიჯანის პრეზიდენტისა და მისი ოჯახის წინააღმდეგ ბინძურ კამპანიას აწარმოებს", - აცხადებს ალიევის პრესსამსახური და ხაზს უსვამს იმ ფაქტს, რომ The Guardian-ზე გამოქვეყნებული სტატიის თანაავტორი სომეხი დინა ნაგაპეტიანია.

"აზერბაიჯანის ლონდრომეტი" (The Azerbaijan Laundromat) - ასე ჰქვია პროექტს, რომელზეც ევროპული გამოცემები, მათ შორის, ბრიტანული The Guardian, გერმანული Süddeutsche Zeitung, რუსული Novaya Gazeta და სხვები მუშაობდნენ. გამოძიების თანახმად, აზერბაიჯანის მმართველი ელიტა ორი წლის განმავლობაში მართავდა 2,8 მილიარდ დოლარიან ფონდს ევროპელ პოლიტიკოსებთან ანგარიშსწორებისა და მათთვის ფუფუნების საგნების შეძენისთვის. საგამოძიებო სტატიების სერიის გამოქვეყნების შემდეგ, აზერბაიჯანის ხელისუფლებამ ქვეყანაში OCCRP-ის ვებგვერდი დაბლოკა.