სლოვაკეთის პრემიერმინისტრი რობერტ ფიცო უკრაინის პრეზიდენტს "მტერს" უწოდებს. მისი ინფორმაციით, თუ ევროკავშირი კიევს რუსეთის წინააღმდეგ ბრძოლაში დაეხმარება, დასავლეთის გეგმებს უკრაინასთან მიმართებაში დაბლოკავს. სლოვაკეთი უკრაინისგან მოითხოვს, რუსეთის გაზი, რომელსაც სლოვაკეთი შეისყიდის თავის ტერიტორიაზე გაატაროს. ამის შესახებ სლოვაკეთის პრემიერ-მინისტრმა რობერტ ფიცომ განაცხადა.

ფიცოს თქმით, უკრაინის პრეზიდენტ ვოლოდიმირ ზელენსკის განცხადება, რომ უკრაინა მზადაა თავის ტერიტორიაზე ევროპისკენ გაატაროს აზერბაიჯანის გაზი, ფანდია საპასუხო ზომების თავიდან ასაცილებლად. თავად ზელენსკის მან მტერი უწოდა. სლოვაკეთის ოპოზიციამ პრემიერ-მინისტრი გააკრიტიკა .

უკრაინის გავლით დასავლეთისკენ გაზის ტრანზიტი მას შემდეგ შეწყდა, რაც ვადა გაუვიდა შესაბამის კონტრაქტს რუსეთის კომპანია "გაზპრომსა" და უკრაინის "ნაფტოჰაზს" შორის.

ფიცომ ადრე უკვე გააკრიტიკა ზელენსკი და დაიმუქრა, რომ ელექტროენერგიით მომარაგებას შეუწყვეტს უკრაინას, დახმარებას შეუმცირებს უკრაინელ ლტოლვილებს და ვეტოს დაადებს უკრაინისთვის ევროკავშირის დახმარებას. სლოვაკეთს სურს, გააგრძელოს რუსეთის გაზის შესყიდვა და უკრაინისგან მოითხოვს, თავის ტერიტორიაზე გაატაროს ის.

ორშაბათს ფიცომ მოიწონა ევროპის კომისიის განცხადება, რომელშიც სხვა საკითხებთან ერთად ნათქვამია, რომ ევროკავშირი გააგრძელებს გაზის ტრანზიტის შესახებ უკრაინასთან მოლაპარაკებებს და მასში უნგრეთსა და სლოვაკეთსაც ჩართავს. დოკუმენტის თანახმად, მესამე ქვეყნებმა უნდა აღიარონ, რომ ევროკავშირის წევრი ქვეყნების ენერგეტიკული ინფრასტრუქტურის მთლიანობა ევროკავშირის უსაფრთხოების საკითხია.

"ჩვენი მტერი ზელენსკია. პრობლემა, რომლის წინაშეც ვართ, ზელენსკიმ გამოიწვია. არ მომწონს ის, ვინაიდან ის სლოვაკეთს ზიანს აყენებს," — თქვა ფიცომ სამშაბათს სლოვაკეთის პარლამენტის ეკონომიკის კომიტეტში გამოსვლისას.

გასულ კვირაში შვეიცარიის კურორტ დავოსში, მსოფლიო ეკონომიკურ ფორუმზე, ვოლოდიმირ ზელენსკი შეხვდა აზერბაიჯანის პრეზიდენტ ილჰამ ალიევს. შეხვედრის შემდეგ ზელენსკიმ განაცხადა, რომ მან და ალიევმა განიხილეს უკრაინის გავლით აზერბაიჯანის ნავთობის ევროპისკენ ტრანსპორტირების პერსპექტივები.