უფლებადამცველების ინფორმაციით, ნეტგაზეთისა და ბათუმელების დაკავებული დამფუძნებლის, მზია ამაღლობელის სიცოცხლე საფრთხეშია. ამის შესახებ ახალგაზრდა იურისტთა ასოციაცია სოციალურ ქსელში გავრცელებულ განცხადებაში წერს.

"უკანონო პატიმრობაში მყოფი მზია ამაღლობელი უკვე მე-16 დღეა, შიმშილობს. მან საიას თავმჯდომარესთან საუბრისას აღნიშნა, რომ მისი შიმშილობა არის პროტესტი უსამართლობის წინააღმდეგ და ეს ნაბიჯი შეღავათების მოთხოვნას არ ემსახურება. საია, როგორც მისი უფლებების დამცველი ორგანიზაცია, იუსტიციის სამინისტროს მოუწოდებს, დაუყოვნებლივ გააკეთოს განცხადება და პერიოდულად მიაწოდოს საზოგადოებას ინფორმაცია მზია ამაღლობელის ჯანმრთელობის მდგომარეობის შესახებ. ციხის ადმინისტრაცია ვალდებულია, სპეციალური პროტოკოლის შესაბამისად, მისი ჯანმრთელობის მდგომარეობის სრულყოფილი და ეფექტური კონტროლი უზრუნველყოს", — წერია საიას გავრცელებულ განცხადებაში.

საია მოუწოდებს საქართველოს პროკურატურას დაუყოვნებლივ შეწყვიტოს ჟურნალისტის უკანონო ბრალდების საქმე და სასამართლოს აღმკვეთი ღონისძიების შეცვლა მოსთხოვოს. ორგანიზაცია ასევე მიმართავს სპეციალურ საგამოძიებო სამსახურს, საზოგადოებას აცნობოს, რა ეტაპზეა მზია ამაღლობელის მიმართ დამამცირებელი მოპყრობის საქმე და რატომ არ შეუჩერდა უფლებამოსილება ბათუმის პოლიციის უფროსს, ირაკლი დგებუაძეს.

"საქართველოს პროკურატურას — დაუყოვნებლივ შეწყვიტოს მზია ამაღლობელის უკანონო ბრალდების საქმე და სასამართლოს წინაშე აღკვეთის ღონისძიების შეცვლა მოითხოვოს, რადგან მზია ამაღლობელის ქმედებები სისხლის სამართლის დანაშაულის ნიშნებს არ შეიცავს;
სპეციალურ საგამოძიებო სამსახურს — საზოგადოებას აცნობოს, რა ეტაპზეა მზია ამაღლობელის მიმართ დამამცირებელი მოპყრობის საქმე და რატომ არ შეუჩერდა უფლებამოსილება ბათუმის პოლიციის უფროსს, ირაკლი დგებუაძეს.
საზოგადოებას შევახსენებთ, რომ მზია ამაღლობელს სისტემა სჯის მისი საქმიანობის გამო, პოლიტიკური მოტივებით და არა იმიტომ, რომ მან რაიმე კანონდარღვევა ჩაიდინა", — წერია საიას განცხადებაში.

მზია ამაღლობელი 20 იანვარს, ნეტგაზეთის მიერ გავრცელებულ წერილში წერდა, რომ შიმშილობა დაიწყო. ის წერდა, რომ შიმშილობდა არა შეღავათების მისაღებად, არამედ უსამართლობის გამო. "ვშიმშილობ. სიცოცხლეზე ღირებული თავისუფლებაა" — წერდა მზია ამაღლობელი.

მზია ამაღლობელი პირველად 11 იანვარს ადმინისტრაციული წესით დააკავეს, როცა მან აჭარის პოლიციის სამმართველოს შესასვლელის ღობეზე გააკრა სტიკერი 15 იანვარს დაგეგმილ საყოველთაო გაფიცვასთან დაკავშირებით.

ბათუმელების დირექტორი მზია ამაღლობელი ხელწერილით გამოუშვეს და მალევე ხელახლა დააკავეს. მეორედ დაკავების შემდეგ, ბათუმელებისა და ნეტგაზეთის დამფუძნებლისა და დირექტორის, მზია ამაღლობელის წინააღმდეგ გამოძიება სისხლის სამართლის კოდექსის 353-ე პრიმა მუხლის პირველი ნაწილით დაიწყო, რაც პოლიციელზე, სპეციალური პენიტენციური სამსახურის მოსამსახურეზე ან ხელისუფლების სხვა წარმომადგენელზე, ანდა საჯარო დაწესებულებაზე თავდასხმის ბრალდებას გულისხმობს. ბრალის დამტკიცების შემთხვევაში მას 4-დან 7 წლამდე თავისუფლების აღკვეთა ემუქრება.

ბათუმელების ცნობით, მზია ამაღლობელთან 3 საათის განმავლობაში არ უშვებდნენ ადვოკატებს. იგი მოინახულა სახალხო დამცველის წარმომადგენელმა აჭარაში, რომელსაც მზია ამაღლობელმა უთხრა, რომ დაკავების შემდგომ ადგილი ჰქონდა არასათანადო მოპყრობას.